MIPUI NAWLPUI LEH HARSA ZAWKTEN MAN TLAWM ZAWKA DAMDAWI AN LEI THEIHNAN AIZAWL CIVIL HOSPITAL COMPOUND-AH DAMDAWI DAWR HAWN A NI

Mipui nawlpui leh mi harsa zawk ten man tlawm zawka damdawi an lei theihna tur 'Generic Drugs Store' tia hriat 'Jan Aushadi Store' chu Aizawl Civil Hospital compound chhungah hawn a ni.

Generic Store hi Damdawi marketing titute kaltlang lo a, a siamtu Company te hnen atanga direct a leia zawrhna a ni a, Damdawi lo zuar chhawng lehtute leh a market tute a kaltlang dawn loh avangin man tlawm takin damdawite hi a lei theih dawn a ni. Damdawi hi Company ten an siam zawhah packing titu company dang ten la in an hnen atang hian stockist/wholesale ten an la leh chhawng a, chumi hnu ah damdawi zuartu ten an la chhawng ve leh a. Heng te hian hlep neia thil an tih vek avangin damdawi man a to phah thin a. Tuna Generic Drugs Store neih turah hi chuan damdawi siamtu Company te kha direct in dawr an ni ang a, a tuam mawi leh pawlhdal awm lovin a nihna ang angin zawrh a ni dawn a, damdawi pawhin hna a thawk chak zawk dawn a ni. Doctor te pawhin company hming nilovin a damdawi hming tak ziakin an chawh a ngai a ni.

Aizawl Civil Hospital, Medical Superintendent chuan Generic Drugs Store a zawrh turin sawrkar laipui chuan item (damdawi) 361 a thlanchhuah/phal a nei a, mahse bultan tur an nih vangin mamawh zualpui chauh an zuar hrih dawn tih a sawi a. An damdawi zawrh chu Doctor te chawh turin an tilui dawn lo a, Doctor te chuan an duh leh thaa an hriat apiang an chawh thei dawn a, hmanglui turin an ti dawn lo tih a sawi a. Generic Drugs Store chu a bultan nan Aizawl Civil Hospital ah hawn phawt a, a tul dan anga hmun dangah pawh hawn zel tum anih thu a sawi bawk.

Dawr hi peih anih hunah chuan tuna damdawi Rs. 100 man vela mipui ten an lei thin hi Rs.20 vela lei theih beisei a ni.

Generic Drugs Store hi Ministry of Chemical & Fertilizers hnuaia Department of Pharmaceutical hmalak na a din tur a ni a, Rajasthan leh Gujarat ah te hlawhtling taka kalpui a ni tawh a, tunah hian Maharastra state ah bultan leh mek a ni. Damdawi te hi sawrkar laipui in a man a bithliah zat ang chiaha hlep awm lova hralh tur a ni a, an hralhna atanga 15% chu a zuartu ten an hlawh ve dawn a ni.

Generic Drugs Store hi mipui tan a tangkai dawn avang leh sum tam tak kalral tur hum anih dawn avangin Chief Minister _ leh Health Minister _ te chuan neih anih theihnan nasa takin sawrkar laipui ah tan an la a, an hmalakna azarah India ram state a a hmasa pawl ni turin he dawr hi hawn thuai tum a ni a, tunah hian license buaipui mek a ni tih Medical Superintendent chuan a sawi a. He dawr hi Aizawl Civil Hospital main building bula mitthi dahna in ah bultan phawt a ni ang a, a hnuah Cabin bula building sak zawh anih hunah sawn tum a ni.

Tunah hian Civil Hospital, Aizawl bakah he damdawi zawrhna hi Hospital Road Dawrpui, Vaivakawn leh Dinthar Veng, Health Directorate bulah dawr theihin an awm mek a ni.