OFFICE OF THE PRINCIPAL DIRECTOR
HEALTH & FAMILY WELFARE DEPARTMENT
MASS EDUCATION AND MEDIA SECTION
DATED AIZAWL THE 25th August, 2017
KUM 2008 - 2017 CHHUNGIN MIZORAMAH CORNEA (MIT DARTHLALANG) DONATE-TU MI 590 AN AWM TAWH.
Kum 2008 atanga kum 2017 inkar chhungin Mizoram-ah a mamawhtute tana mit darthlalang (cornea) pe mi 590 awm tawhin heng atang hian cornea mamawh mi 335 te chu thlaksak an ni tawh.
He thu hi vawiina Eye Donation Fortnight hawnna inkhawm, Health Worker Training School, Kulikawn Aizawla neihah Dr.Lalhmingmawii, i/c Eye Bank, Civil Hospital Aizawl chuan a sawi.
Vawiina Eye Donation Fortnight hawnna inkhawm hi Dr.Lalremmawii, State Programme Officer, National Programme for Control of Blindness & Visual Impairment in a kaihruai a. Dr.Lalhmingmawii, i/c Eye Bank, Civil Hospital Aizawl chuan Eye Bank Report a pek bakah Mimi Zodinthari, Eye Donation Counsellor in Eye Donation chungchang sawi zauhna leh pledge card semna hun a hmang bawk.
Eye Donation Fortnight hi kim tin India ram pumah August ni 25 atanga Sept. ni 8 inkarah hman ziah thin a ni a. He hun hi Prime Minister Rajiv Gandhi-an a mit a pek atanga hman tan a ni.
Vawiina he hun hawnna inkhawm hi Health Worker zirlai ten an hmanpuiin heng zirlaite hnenah hian Eye donation pawimawhna leh thatna te zirtir an ni a. Chumi rualin mit donate turte tana hriat tur pawimawh te pawh zirtir an ni bawk. Health Worker te chu nakin maia vantlang hriselna atana thawktu tur mi pawimawh an la nih dawn avangin hemi kawnga midangte la zirtir thei ngei turin zirtirna an inpe uluk hle a ni.
Mizoramah hian 31st July, 2008 khan Civil Hospital, Aizawl-ah Eye Bank hi neih tan a ni a. Sorkar Hospital zinga Eye bank hmasa ber a ni bawk. Sawi tawh angin Kum 2008 atanga kum 2017 inkar chhungin Mizoram-ah a mamawhtute tana mit darthlalang (cornea) pe mi 590 awm tawhin heng atang hian cornea mamawh mi 335 te chu thlaksak an ni tawh a. Mit Donate hian mitthi tawhte hmel leh lan dan a ti hmelhem lo va. Mitlak chhuah chhung pawh hi min 10 atanga minute 15 inkar chauh a ni bawk. Tin, mit donate hi mi hrisel tha pangaiah chuan naupang atanga tar thlengin donate theih a ni a. Amaherawhchu, HIV/AIDS, Seticaemia etc leh thisen lam atanga inkai chhawn theih natna vei tan erawh pek a remchang lo thung.
National Programme for Control of Blindness & Visual Impairment chuan midangte tana malsawmna ni thei tura ui lova kan mit te a mamawhtute tana pek hreh lo turin mipuite a ngen a ni.
