Vawiin September ni 23, 2021 (Ningani) chawhnu dar khat khan Taxation Auditorium MINECO-ah Mizorama damlo ten a thlawna an damdawi in awmna senso an bill let leh theihna AB-PMJAY kum thum tlin pualin AROGYA MANTHAN 3.0 hun hman a ni a, Pu R.Lalramnghaka IAS, Secretary Health & Family Welfare Department chuan Khuallian niin a hmanpui.

He AB-PMJAY kum thum tlin lawmna hun hi Dr.Chawngthanchhunga, Principal Executive Officer, Mizoram State Health Care Society-in a kaihruai a. Dr.Biakthansangi Chief Executive Office, MSHC in Programme Highlight hun hmangin Mizorama AB-PMJAY kalpui dan te chipchiar takin a sawi a. Hemi hnu hian Health Secretary Pu R.Lalramnghaka IAS hnen atangin thusawi ngaihthlak a ni.

Health Secretary chuan "Mizoram sawrkar chuan mipuite hriselna a ngai pawimawh hle a. Tin, damloh nikhuaa mipuite inekawlna senso bill let kawngah pawh theihtawp a chhuah mek zel a ni. AB-PMJAY pawhin tluang taka kum thum hmel hial a han hmu chho ta hi a lawmawm tak meuh a ni," a ti. Health Secretary chuan  mipui zinga AB PMJAY la hmelhriat mumal lo te pawh ngaihtuahna senga he thil hi ngaihven thar leh turin a chah a. India ram Small State zingah Claim Submission  ti tha ber dawttu a Civil Hospital Aizawl thlan chhuah a ni chu lawmawm a tih thu a sawi bawk. Tin, thawktute pawh  hmasawn zel tura fuihin harsatna an neih pawha an tana sawrkar a inhawn reng thu a sawi a. Health Secretary hian AB-PMJAY enkawl kawnga ti thate hnenah lawmman a sem nghal bawk a ni.

AB-PMJAY Prime Minister Narendra Modi in a duan chhuah niin kum October ni 1, 2018 atang khan Mizoramah hman tan a ni a. He Scheme-in a huam chin Socio Economic Caste Cencus 2011 deprive list-a awm, Golden Card leh PM Letter nei damlo ten kum tin Rs. Nuai 5 zel an bill thei a ni. Kum 2018 atanga AB-PMJAY scheme kan lo hman tawh dan chu hetiang hi a ni:

(AB-PMJAY chungchang rawn attached a ni)