India ram hriselna beihpui thlakna programme pakhat Ayushman Bharat, Healthy India Fortnight Walkathon chu vawiin September ni 16, 2019 (zing dar 6:30) khan Vanapa Hall atanga kawng zawha bultan niin Millenium Centre kawtah hunserh hman a ni a, Dr.ZR Thiamsanga, MLA, Vice Chairman, Health & Family Welfare Board in khuallian niin hun a hmanpui.
He Ayushman Bharat Pakhwara Fortnight hawnna inkhawm Millenium Centre kawta neih hi Dr.Eric Zomawia, Mission Director, NHM in a kaihruai a ni.
He huna thusawitu Dr.ZR Thiamsanga chuan hriselna hlutzia leh man to zia hriatna kawngah mipuite kan thangharh ve ta tial tial chu lawmawm a tih thu a sawi a. Hriselna ngaih pawimawh nachang hi kan hriat deuh deuh a hun tawh a ni a ti a. MLA Dr.ZR Thiamsanga chuan, "Tunah hian miharsa zawkte pawhin huamzau zawka an hman tlan theih tur, mitin huapzo Health Care tha mi hmang tan turin Mizoram sawrkar leh Health Department thawktu lamte an inpuahchah mup mup tawh a. he Health Care scheme thar hi October ni 1-ah Chief Minister zahawm tak Pu Zoramthangan a hawng dawn a ni" tiin hriselna kawnga sawrkar hmalaknate hi mipui lamte pawhin a hlawhtlinna kawngah mawh kan phur a ni a ti bawk. Dr. ZR Thiamsanga bakah hian Dr.F.Lallianhlira, Principal Director Health & Family Welfare leh Dr.Biakthansangi, CEO, Health Care ten thusawina hun an hmangin Dr.Lalzepuii, Jt. Director Planning in lawmthu sawiin hun tawp a khar a ni. VawiinaAB Walkathon-ah hian TKP member, Baptist Mission Vengthlang Unit ten kawng an zawh a ni.
India ram hi hriselna kawngah khawvel ram dangte ngaihtuah chuan kan sang lem lo hle a. Thailand-ah chuan hriselna atana sum an hman ral zawng zawng 77.8 % hi sorkar tum a ni a, mimal tum chu 11.9 % chauh a ni. Hetih lai hian India rama hriselna atana kan senral zawng zawng zingah Sawrkarin Hriselna atana a thawh ve (Govt Health Expenditure) chu 30% chauh a ni a, hemi kawngah hian khawvelah ram 191 ah India hi 176-na kan ni. Hetih lai hian WHO tum dan chuan ram zawng zawngin 2030 ah chuan ram hrang hrangin Universal Health Coverage an kalpui tawh tur a ni tih a ni a. Universal Health Coverage chu mi zawng zawngin sum leh paiah harsatna neih phah lova healthcare an dawng phak ang tihna a ni. Rampum hriselna atana pawimawh em em chu Universal Health Coverage neih hi a nih avangin chu UHC nei thei tur chuan India sawrkar pawhin scheme pawimawh em em mai ‘Ayushman Bharat’ hi a duang chhuak ta a ni.
A thil tum ber chu mipui tan hriselna tluantling (holistic healthcare) pek – prevention (invenna); health promotion (hriselna inzirtirna); primary, secondary & tertiary level care (damdawiin tenau atanga lian ber thleng a inenkawlna) heng pahnih hmanga pek te a ni a.
Kum 2022-ah chuan Health & Wellness Centre nuai 1.5 siam te, Sub centre zawng zawng leh PHC zawng zawng Health & Wellness Centre a leh vek a, chuta tanga Comprehensive Primary Health Care (CPHC) services pek te, PMJAY hmanga mipuite a thlawna damdawiina inenkawlna tur pek bakah chhung tinte’n kumkhata cheng nuai nga thlenga an bill theihna tur leh thildangte a huam a ni.
Ayushman Bharat Pakhwara (Healthy India Fortnight) ah hian AB awmzia leh hmalakna nasa thei ang bera puanzar a ni dawn a ni.
