OFFICE OF THE PRINCIPAL DIRECTOR HEALTH & FAMILY WELFARE DEPARTMENT

............................

MASS EDUCATION AND MEDIA SECTION

PRESS HANDOUT

 

DATED AIZAWL 

The 3rd  February, 2020

 

CORONAVIRUS CHUNGCHANGA SAWRKAR THUCHHUAH

 

Novelcoronavirus hrileng chu WHO chuan Public Health Emergency of International Concern (PHEIC) ah puang tawhin tunah hian ram 27-ah he hri hi kai awm mahsela, China bikah hian a vei an tam ber a. Tun dinhmunah mi 16,831 ah a hrik hi hmuh tawh ni mah sela thi hi 362 chauh an la ni. India rama Kerela state-ah mi pahnih-ah a hrik hi hmuh ni tawh mahsela thihpui an awm lo. Tin, he hrileng hian Mizoram a la rawn lut lo a ni.

 

            Mizoram sawrkar chuan theihtawp chhuahin he hrileng laka inven leh do let turin theihtawp a chhuah reng a. January ni 30 khan Health Minister Dr.R.Lalthangliana hovin State Level Meeting pawh neih niin chu meeting-ah chuan Task Force din a ni a, he Task Force hian hmalak tulna apiangah hma a la chho tan mek a ni. Sawrkar Laipui lama coronavirus hrileng buaipuitute nen pawh nitin inbe pawpin hmalakna report-te pawh thawn thin a ni. Lengpui Airport-ah ram dang atanga khualzin lo lut, a bik takin China atanga lo kalte chu ngaihven zual bik an ni.

 

            Mizoram sawrkar chuan Lengpui Airport bakah hian Zokhawthar lamah pawh khualzin endik hna hi thawh chhoh mek niin, a tul angin hmun dangahte pawh hma lak zel a tum. State Level Task Force bakah District tinah Coronavirus hrileng a awm palh pawha lo hmachhawn turin District Task Force din tura hmalak a ni.

 

            China ram hi sumdawng leh zirlai eng emawzatin an tlawh pawh avangin Kolkatta Airport lo thlengte chu an hriselna endik hmasak thin an ni a. Airport screening hi tun dinhmunah hmun 21-ah kalpui mek a ni a, sawrkar thahnemngaihna in Lengpui Airport-ah hian khualzinte hriselna dinhmun hi lo endik leh thin a ni.

 

            Sawrkar chuan thuthang nazawng avanga mipuite chiai lo turin a ngen a. Social media lama mi pahnih, quarantine-a awm mek nia sawite pawh hi an damloh avang ni lovin fimkhur thuhlaa pawn chhuak rih lo tura tih mai an nih rualin an chhungte pawh lo hrethiam tura ngen an ni.