OFFICE OF THE DIRECTOR
HEALTH & FAMILY WELFARE DEPARTMENT
............................
MASS EDUCATION AND MEDIA SECTION
(PRESS HANDOUT)
DATED AIZAWL
The 23rd June, 2020
COVID19 SAMPLE RESULT CHAK ZAWKA HRIAT THEIH A NI TAWH ANG.
“ Quarantine Centre-a awmte leh suspect ten Covid19 Sample result rang zawka an hriat zung zung theih nan theih tawp chhuah a ni”
H.Lalengmawia, IAS Secretary HFW
Quarantine Centre-a awm mek te leh COVID19 suspect ten an test sample result rang zawk leh hma zawka an hriat zung zung theih dan tur leh chak zawka sample lak a nih theih dan tur sawihovin vawiin June ni 23, 2020 (Thawhlehni) chawhnu dar 2 khan Zoram Medical College-ah Pu H.Lalengmawia, IAS, Secretary H&FW hovin Health Department Officials te an thukhawm.
He meeting pawimawh takah hian Dr.Grace-i hnen atangin Sample test Back Log awm dan ngaihthlak a ni a. June ni 16 thlenga sample lak te chu vawiin ni 23.6.2020 hian test kim vek hman tum a ni. Sample Labelling felfai tawk lo te pawh hrilh nghal a, rang taka sample lak that leh vek tura tih an ni bawk. Tun dinhmunah hian ZMC-a sample test tawh zawng zawng hian singkhat a chuang tawh a ni.
Health Secretary chuan sample result nghaktu ten an sample result an hriat vat chu thil tih makmawh a nih thu leh sample dissemination chungchanga chak zawka hma la turin thawktute pawh ruahmanna a neihpui nghal a. Tun hnaia mipui lam atanga sample result hriat har avanga vuivaina ri lo awmte chu a hriatthiampui thu leh Result Dissemination process chu fimkhur ngai thil anih avangin a kawng a thui hle a, communication gap lo awm palh thei a nih avangin thawktute chanpual pawh siksawi rem nghal a ni. A bik takin Negative result ngat phei chu quarantine facility-a awm te tan quarantine hunbi thlenga tidanglam thei leh hunbi pela in khung hran phah theihna thil a nih avangin sms portal hmanga inhrilh ran a ni tawh ang a ti.
Hetiang hi thil awm dan a nih avangin vawiina meeting chuan naktuk June ni 24 atang hian ZMC sms portal atangin result hi thawn chhuah nghal zel a ni tawh ang. Mahni result chhuah hun tawha ngai, la hre si lo te chuan Hming, Address, Kum Zat leh Phone no chiang taka tarlangin covid19@zmc.edu.in ah thawn tur a ni a. Anni hian rang takin result an lo thawn let nghal dawn a ni.
Health Secretary chuan Mamit leh Siaha lama result hriat har avanga chaw nghei mek ten sawrkar nena inremna ngai pawimawha an nawrhna an titawp ta pawh lawmawm a tih thu sawiin Sawrkar leh Health Department hmalakna ring ngam turin mipuite a chah bawk a ni.
