PRESS RELEASE
Global IDD Day 2023 hman a ni :-
Vawiin dar 11:00AM khan Global Iodine Deficiency Disorder Prevention Day Directorate of Health Services Old Building, Conference Hall, Dinthar Aizawl-ah hman a ni a, Dr. Lalremmawii, Director of Health Services chu Khuallian a ni.
He hun hi Dr. R. Lalchhuanawma, State Programme Manager, National Health Mission in kaihruaiin, Pu Laldinchhuaha, Laboratory Assistant in Salt Testing Kit hman dan a entir a, Salt Testing Kit sem nghal a ni. Khuallian chuan Iodine chungchangah Health Department hmalakna hrang hrang leh Iodine pawimawhna te a sawi a, Mizoram-ah 98.8% in tun dinhmunah chuan Iodine chi kan ei tawh a, Awrpuar an tlem tawh thu a sawi. Amaherawhchu, raipuar laiin Iodine an mamawh hnem ber a, Iodine tlakchham loh nan Bawnghnute atanga thil siam, Sangha te, leh Lui lam saten Iodine an pai hnem avangin ei uar a pawimawh thu a sawi a. Raipuar laia Iodine tlakchham hian naute-ah pianphunga harsatna hrang hrang ; nau chhiat, hlamzuih, \awngthei lo, mitkalh, fuke tawi leh rilru chak lo a thlen thei a, raipuar laiin Thyroid Function Test ngei ngei a \ul thu a sawi bawk.
Global Iodine Deficiency Disorder Prevention Fortnight hi Ni 21 October, 2023 atanga 3rd November, 2023 chhung hman tur a ni a, a thupuiah ‘I taksa leh rilru hrisel nan Iodine chi ei la, I chi bur phui takin chhin ang che’ tih hman a ni.
