Ni 10.10.2017 khan Health & Family Welfare Department buatsaihin Chanmari YMA Hall-ah World Mental Health Day hman a ni a, Health Minister Pu Lal Thanzara chu khuallian a ni.

Pu Lal Thanzara chuan kumin World Mental Health Day thupui - Rilru Hriselna; Hnathawhna Hmunah (Mental Health at Work Place)-in a tum ber chu hnathawhnaa inpawhtlanna, lungrualna leh inthliarhranna tello, rilru hriselna nena hna thawhho a ni, a ti. WHO-in a chhut danin khawvel pumah mi vaibelchhe 30 velin depression an nei a, mi vaibelchhe 26 velin anxiety disorder an nei a, heng natna pahnih veitu, hna thawk theilote avang hian kum tin US Dollar tluk leh dingawn sangkhat hloh ziah thin anga chhut a ni, Minister chuan a ti. Rilru lama harsatna chungchangah inzirtirna ngawrh taka kalpui a nih avangin thil zahpuiawm a nih loh zia leh taksa peng dang natna nen a inang reng tih mipuiin kan pawm thiam ta viau nia sawiin Pu Lal Thanzara chuan tun aia nasa hian rilru lama harsatna nei ten doctor-te pan nachang hria se a duh thu a sawi a. Hnathawhna hmun hi hun kan hman tamna ber a nih avangin rilru puthmang nasa takin a nghawng thei a, hnathawhna boruak hrisel nei thei turin kan thawhpuite harsatna hrethiam a, inngaihsak tawn leh harsatna tawkte tana rilru hahchawlhna hmunah siam kan tum tur a ni, a ti bawk.

World Mental Health Day hi khawvel hmun hrang hrangah kum 1992 atang khan October ni 10 ah hman thin a ni a. He ni-ah hian rilru hriselna chungchang zirho thin niin rilru lam harsatna neite hmuhsit leh endawngna a tlem tial tial theihna atan hmalak thin a ni.

Vawiin programme-ah hian Mental Health chungchang thupuia hmangin extempore speech inelna buatsaih a ni a. Regional Institute of Paramedical and Nursing Sciences (RIPANS) zirlai Lalrosangi chu pakhatna a ni a, Health Worker Training School zirlai F.Lalbiaksanga chu pahnihna niin Lalremruati Fanai, Mizoram Colloge of Nursing zirlai chu pathumna a ni. District Mental Health Programme a thawk tha zual District pathumte hnenah lawmman hlan a ni bawk a. Pakhatna latu chu Siaha District an ni a, Aizawl District-in dawtin Champhai District chu pathumna a ni.

Psychiatry OPD hi Civil Hospital OPD room no 309-ah a awm a, Thawhtanni atanga Zirtawpni-ah engtiklai pawhin psychiatrist rawn tur an awm reng a, Psychiatry Hospital hi Kulikawnah a awm thung.