Nimin 30.8.2018 chawhnu khan Health Minister Pu _ chuan Sairang Primary Health Centre (PHC) building thar a hawng.
Khuallian Pu _ chuan Sairang leh a chhehvel khuate tan PHC building thar hawn a ni chu lawmawm tiin hmasawnna mellung pawimawh tak a ni, a ti a. Building thar chuan thawktute pawh nasa takin phurna a pek a beisei thu a sawi a. Sairang khua chu highway kawngpui hrula awm a ni a, Tlawng kam maia awm a nih bawk avangin PHC hian pawimawhna a nei lian lehzual a ni, a ti a. Lirthei chesual leh tuia chesual ten an pan hmasak ber a ni fo a, chuvangin thawktute mawhphurhna pawh a sang lehzual a ni, a ti. Hriselna hi ram hmasawnna tehfung pawimawh tak a ni tiin hriselna kawngah mipuite pawhin tihtur kan nei theuh a, ei leh in lama fimkhur te, zuk leh hmuam laka fihlim te, taksa insawi zawi that te a ni, a ti a. Natna tam zawk a thlawna enkawl thei tur leh hmuchhuak thei turin Sub-Centre leh PHC thenkhat Health & Wellness Centre-ah hlan kai chhoh mek an nih thu a tarlang a. Sairang PHC chu bial chhung mipuite leh khawtlang pawl hrang hrang hruaitute bakah kohhran ten chhawmdawlin, pantu damlo ten an tangkaipui tur thil hrang hrang ngaihtuahsak an lo ni tawh thin chu lawmawm a tih thu sawiin Sairang mipuite chu fakawm a tih thu a sawi a. An kal zelna turah duhsakna a hlan a ni.
Sairang PHC building thar hi kum 2006 khan sak tan a ni a, Rs. 94,50,000 senga sak niin 13th Finance Commission bultum a ni. A zau zawng hi 293.50 sq.m a ni. Sairang PHC-ah hian office room, casualty, consultation room (2), minor OT, female ward, male ward, delivery room, buffer zone & sterilization a awm a, RCC water reservoir awm telin PHC tana Indian Public Health Standard in a tarlan angin khum paruk (6) a awm a ni. Tun dinhmunah hian hnathawk 30 an awm mek a, mipui 6000 chuang Sairang PHC huam chhungah hian an awm a ni.
H&FW hnuaia Health Services Director Dr. H. Lalchungnunga chuan programme hi a kaihruai a. PWD Project Division EE Pu Lalthanzuala Ralte chuan technical report a pe a. MUP leh Village Council hruaitute atangin thusawi ngaihthlak a ni a. Aizawl West Chief Medical Officer Dr. Lalthanga chuan lawmthu sawina in hun a khar a ni. Health Department hnuaia doctor te leh staff dang te, Sairang PHC hnathawkte leh Sairang NGO hruaitute leh mipuite an tel a ni.
