Health Minister-in ZMC&H College Graduation Day Hmanpui; Interventional CT Scan hawng bawk

Dated Aizawl, the 26th May, 2026 : Health and Family Welfare Minister Pi Lalrinpuii chuan Zoram Medical College and Hospital (ZMC&H) a zirlai kumina MBBS zirchhuakte puala buatsaih “Graduation Day” a hmanpui a, Mizorama a hmasa ber ni turin Interventional CT Scan a hawng bawk. He hunah hian Adviser to CM (Finance) Pu TBC Lalvenchhunga leh Higher and Technical Education Director Pu Laltanpuia te pawh an tel a ni.

Lecture Hall-4, Academic Block, ZMC&H a Graduation Day inkhawmah khuallian Pi Lalrinpuii chuan graduate tharte chu Covid-19 hunlaia zirna tan mah ni se, tha taka an pass theih avangin a lawmpui thu a sawi a, doctor indaihlohna pawh engemaw chen chu a phuhruk ngei a ring tih a sawi. Mizoram sawrkar chuan MBBS an zir theih nan theihpatawp a chhuah pui a, zirtirtu tha tak takte a rawih bakah fee pawh a tumsak a, chuvangin Mizoramin an thiamnate a mamawh hunah tlanchhe mai lova, bond (inremna) an ziah chu puitlin vek turin a chah a, zirlaite hian an zir zawh hnuah kum hnih (2) chhung Mizoram sawrkar hnuaia thawk turin inremna hi an zir hmain an lo ziak tawh a ni.

Health Minister chuan graduate tharte chu an zir zawm dawn pawhin Mizoramin a mamawh tak tak subject - Anesthesiology, Biochemistry leh Microbiology etc., te thlang tura ngaihtuahna seng turin a fuih a. Mizoram Universal Healthcare Scheme (MUHCS) hnuaiah mipuite tan inenkawlna tha leh awlsam zawk a awm theih nan hma lak reng a nih thu a sawi a, Mizoramah a vawi khatna’n Interventional CT Scan hawn ani thei chu lawmawm a tih thu a sawi bawk.

Khualzahawm Pu TBC Lalvenchhunga chuan Mizoram-in medical college a neih ve theih nan sawrkar hmasa ten nasa takin hna an lo thawh tawhna chu a lawmawm a tih thu a sawi a, graduate tharte chu damlote chu hriatthiamna nen enkawl a, tlawmngaihna nena daktawr hna chu thawk turin a fuih a ni.

Dr Lily Chhakchhuak, Mizoram Health Systems Strengthening Project (MHSSP) a Project Director chuan Interventional CT Scan hawn thar chungchang sawiin, u-CT 780 Model, 128-Slice CT Scanner System chu MHSSP hnuaia hmalak a ni a, cheng vaibelchhe 8.18 man niin, MHSSP World Bank tanpuina a kalpui a ni. He CT Scan hi AI (Artificial Intelligence) hmang niin thlalak fiah zawk leh radiation tlem zawk pe chhuak thei tura duan a ni a, lung lam thalo te, naupang te leh cancer enkawlnan a tha bik a ni. Interventional CT Scan hi Department of Radiodiagnosis hmunah bun a ni. MHSSP hnuaiah hian Champhai leh Siaha distrcit-ah CT Scan khawl dah a ni tawh bawk a ni.

August ni 7, 2018 a ZMC&H din tirh a nih atanga tun dinhmun a thleng thei chu a lawmthu a sawi a, nikum atangin Post-Graduate (PG) zirna tan a nih tawh thu sawiin, department panga (5)- Anaesthesiology, General Medicine, General Surgery, Obstetrics & Gynecology leh Pediatrics-ah seat pahnih theuh hawn ni tawhin zirlai pakua (9) an nei mek a, Master of Public Health (MPH) zir mek pariat (8) an awm bawk.

Graduate tharte hi batch thumna niin kum 2021 February atangin zirna bul an tan a, final exam pe zirlai 98 zinga 96 te chu graduate theiin pass percentage chu 97.95% a ni. Zirlai titha bikte hnenah lawmman sem a ni a, Alex Vanlalruatkima, C. Lalhmachhuani, leh Zosangpuii te chu pakhatna, pahnihna leh pathumna (an hming indawtin) an ni. Col VL Ruata Award pawh sem niin, zirna piah lama activities hrang hranga titha Paul Ngurthantluanga Vanchhawng hlan a ni. Zirlaite aiawhin Alex Vanlalruatkima chuan thu a sawi bawk.

He programme hi Prof. Zoramthara Zadeng chuan a kaihhruai a, Prof. Swati M Patki, ZMC&H Dean chuan graduat tharte chu oath taking neih puiin, Prof. Benjamin Lalrinpuia, Organising Secretary chuan lawmthu sawinain hun a khar a ni.