Health Minister Pi Lalrinpuii Online Medical Referral System a tlangzarh

Dated Aizawl, 20th May, 2026: Vawiin chawhma khan Health & Family Welfare Department changtu Minister Pi Lalrinpuii chuan, mipuite tana healthcare service leh sawrkar hnathawh tihchak zualna turin, Online Medical Referral chu SAD Conference Hall, MINECO-ah a tlangzarh.

Minister Pi Lalrinpuii chuan Online-a Medical refer awlsam taka Health & Family Department hnuaia  tih theih a ni ta mai chu lawmawm a tih thu a sawi a. Digital hmalakna-te hi healthcare governance tih changtlunna leh mipuite tana kawng awlsam leh hmalakna tha zawk  thlenna kawnga hmasawnna pawimawh tak a ni tih sawiin, Online system hi document dahṭhat nan te, information inpek nan te leh awlsam zawka mipuite dawrna kawngah hmang ṭangkai turin kalkhawmte a chah a. Tunlai khawvel thiamna (digital) hmangin MUHCS online registration pawh awlsam taka tih theih  a nih thu sawiin, tun dinhmunah chhungkaw 46,000 chuang an in register tawh thu a sawi bawk.

Minister Pi Lalrinpuii chuan medical officer te chak taka hmala zel turin a chah a, "He Online Medical Referral System hi a nihna tur tak a hman a nihtheih nan kan hnathawhna ah tihtakzet leh tha thlah loa kan thawh a ngai" tih sawiin, emergency refer atan a ṭangkai tur thu leh a viltuten an vil hneh a ngaih thu a sawi bawk. Health & Family Department hnuaiah hmalakna thar tam tak a awm a, hengte hi hmang ṭangkai tur chuan Health Department hnuaia Officer-te theihtawp an chhuah a, district tina CMO ten ṭan an lak a, an hnathawh an pholan thiam a ṭul tiin he Department a thawktute a chah.

Health & Family Welfare Department, Commissioner leh Secretary Pi K Lalrinzuali chuan he thil an tihlawhtling thei chu lawmawm a tih thu a sawi a, "Vawiin hi kan department leh Mizoram mipuite tan Ni chhinchiahthlak tak a ni" a ti.

He Online System hi State-a digital governance leh healthcare infrastructure tih chak zualna kawnga hmasawnna pawimawh tak  a ni dawn a ni.

Health & Family Welfare Department buatsaih Online Medical Referral System tlangzarh-na programme ah hian MSeGS Project Manager Pu Isaac Zothanpuia'n technical report pein, portal hmandan tlangpui a tarlang a. Hospital & Medical Education, Health & Family Welfare, Director Dr Zonunmawii Pachuau chuan lawmthu sawiin he hun hi a khar a ni. 

Online Medical Referral System chungchang:

Mizoram Sorkar chuan mipui hriselna ngai pawimawhin, damlo enkawlna kawnga harsatna awm te zirchiangin, siamthat dan tur a ngaihtuah a. Damlo na tak, Mizoram pawna enkawl ngai te tan referral kal phung, awlsam zawk leh mipuite tana rang zawka tih dan tur a ngaihtuah a. Damlo phaia refer a bik takin, Aizawl District pawna awm te tan, hun khawh ral lo leh an refer-na hmun rang taka an thlen theih nan, Directorate of Hospital & Medical Education (DHME) leh Mizoram State e-Governance Society (MSeGS) te ṭangkawpin Online Referral System an rawn duang chhuak a ni.

Medical Referral Board hi tun dinhmunah, Aizawl leh Lungleiah chiah awm in, Medical Referral Board-in a recommend te chu an thawhna Department aṭanga Forwarding lehkha nen DHME-ah provisional permission dil a ngai ṭhin a. Hei hi damlo tan a buaithlakin, hun tam tak khawh ral  ṭhin a ni.

Tunah chuan District Hospital tinah District Screening Committee (DSC) din ni tawhin, phaia damlo refer ngai te an awmna district DSC te’n lo zirchiangin, Medical Referral Board (Aizawl & Lunglei)-te nen video conferencing hmangin recommendation an siam tawh anga; chu recommendation chu DHME-ah kal kher ngai lovin, phone emaw personal computer emaw aṭangin link medicalreferralmizoram.in ah lutin online hmanga permission hi cheng 20 chawiin dil tur a ni.

He Online Referral Portal hi Sorkar hnathawk-te tana siam a ni a, an department thawhna aṭanga forwarding letter leh board lehkha nen upload mai tur a ni. Provisional permission nen hian, Mizoram State Health Care Society (MSHCS)-ah in-report leh tur a ni. Sorkar hnathawk nilo (MUHCS beneficiaries - General) te chu MUHCS-ah medical board lehkha nen in report tur a ni thung. Final permission hi document enfel a ngaih avangin, DHME-ah damlo emaw an chhungte emaw office hun chhunga kalin lak chhuah theih a ni ang.