Health Minister Pi Lalrinpuii'n NABARD RIDF sum cheng nuai 601.34 senga sak Sub-District Hospital Tlabung building thar a hawng
Lunglei, 2026 Ṭomir thla ni 12: NABARD RIDF sum cheng nuai 601.34 senga sak Sub-District Hospital Tlabung building thar chu Mizoram sawrkara Health & Family Welfare Minister Pi Lalrinpuii'n vawiin khan a hawng.
Health Minister Pi Lalrinpuii chuan Tlabung chu khaw hlun leh hmun pawimawh hmasa, tun thlenga heritage building eng emaw zat la awmna a nih thu sawiin, kil hrang hranga a pawimawhna chuan hriat leh ngaih pawimawh a hlawhtir phah deuh deuh a beisei thu a sawi a. Hriselna kawnga hma lakna hrang hrangah pawh ṭan la thar deuh deuh va, hmasawn zel tum turin thawktute leh mipuite a chah.
Health Minister chuan mipuite'n ṭangkai zawka damdawi in an chhawr theih nan a enkawlna leh inrelbawlna (management) lam a pawimawh hle tih sawiin, natna zawn chhuah hna thawktu laboratory lam te, damlo enkawltu nursing lama thawkte leh doctor te, eirawng bawltu bakah a tifaitute thlenga ṭha tak leh inpawh taka an thawh ho a ṭul hle tih a sawi a. Tlabung Sub-District Hospital chu hmanraw ṭha zawk leh thawktu tam zawk nena thuam changtlun a nih chuan hmunpui pan ngai ṭhin tam tak chu enkawl theih an nih tawh dawn avangin mipuite'n an chhawr ṭangkai lehzual thei dawn niin a sawi.
Pi Lalrinpuii chuan Mizorama doctor indaih lohna zualpui phuhruk nan MBBS 20 leh BDS 5 lakna tur thil pawimawh te hmanhmawh taka buaipui mek a nih thu sawiin, mipuite'n an chhawr ṭangkai zawk theihna tura District Hospital, Sub-District Hospital, CHC, PHC leh Medical College te tihchangtlun chhoh zel tum a nih thu a sawi a. Damna duha damdawi in pan ṭhin damlote chu taksa damna tluantling an pe thei lo a nih pawhin rilru damna pek tuma theih tawp chhuah ṭhin tur te, damlo leh anmahni awmpuitute lo chhawn danah a ṭul anga inenfiah a, hmasawnna kawng zawh tum zel turin thawktute a chah.
Sub-District Hospital Tlabung building thar hawnna inkhawm hi Health & Family Welfare Commissioner & Secretary Pi K. Lalrinzuali chuan a kaihruai a. Tlabung mipuite'n Mizoram tan kawng tam taka hlutna an neih thu sawiin, an pawimawhna chu sawrkar pawhin a hriatpui thu a sawi a. Tlabung khuain hma a sawn theihna tura khawtlang hruaitute'n thawh hona ṭha tak an nei ṭhin chu chhuanawm a tih thu a sawi.
Sub-District Hospital Tlabung hawnnaah hian West Tuipui bialtu MLA Pi Prova Chakma chuan Tlabung damdawi in sak thar leh tihchangtlun a ni chu lawmawm a tih thu sawiin, ṭha zawka thuam changtlun zel a nih a beisei thu a sawi a. Power & Electricity Department Chief Engineer Er Laltlanthanga leh Tlabung Sub-Divisional Officer (Civil) Pu Moses Lalfakawma Tlau te pawhin thu an sawi a. H&FW Sr Executive Engineer Er. Malsawmdawngliani hnen aṭangin Sub-District Hospital sak chungchanga technical report ngaihthlak niin, Director of Health Services Dr Vanlalfela'n lawm thu sawiin hun a khar.
Sub-District Hospital Tlabung hi khum 30 awmna niin, a sak ṭhatna tur hian NABARD RIDF XXIX 2023–2024 hnuaiah a zavaiin cheng nuai 601.34 ruahman a ni a. He damdawi in sak ṭhat hna hi Zothan Consultancy Services te'n thawkin, January ni 20, 2025 aṭanga hna ṭanin, February ni 3, 2026-ah an zo va. A chhuat awh zau zawng hi square metre 824.73 niin, chhawng hniha sak a ni a. A chhawng khatnaah hian general ward, nursing station, X-ray, operation theatre, ultrasound leh endoscopy bakah, laboratory leh nau neihna pindan te awmin, a chhawng hnihnaah hian damlo awmna general ward bakah, nursing station leh inthiarna hmun te dah a ni bawk.
Attachment
