Nimin 17.9.2018 chawhnu khan North Eastern Council (NEC) kaltlanga Rs.2.28 crores senga lei Mizoram chhimlama Computed Tomography (CT) Scan khawl hmasa ber ‘Siemens 16 Slice CT Scan’ chu Health and Family Welfare Minister Pu _’n damlo leh mamawhte hman theih turin a tlangzarh. He hunah hian Cancer Day Care Centre, Blood Component Separation Unit leh NEDP kaltlanga Hospital hmanraw hrang hrang lei thar te Health Minister hian a hawng nghal bawk a. Cheng vbc 5 senga sak tur H&FW Department Type IV leh Type III Staff Quarter leh cheng vbc 3.81 senga sak tur Trauma Centre lungphum te a phum bawk a ni.
Health and Family Welfare Minister Pu Lal _ chuan hriselna lama Mizo mipuiten hma an sawn zel theihna turin Health Department chuan theihtawp a chhuah thin thu sawiin NEC, Health Ministry, National Health Mission (NHM) leh DoNER Ministry ah te mipuite mamawh Project tam tak thehluh thin a nih thu a sawi a. Heng hmalakna hlawhtling engemawzat hmuh theih leh tarlan theiha a awm chu lawmawm a tih thu sawiin CT Scan khawl leh hospital hmanraw dangte chu mipuiten tangkai taka an hman ngei a beisei thu a sawi a. CT Scan khawl chu Lunglei leh chhimbial pum mipuite leh Damdawi In hrang hrang ten an in hmantawm tur a nih thu sawiin a khawl enkawl tur mithiam bik technician te rawn dah belh an tum thu a sawi bawk.
Mizoram sawrkar Flagship Program pawimawh tak NEDP chungchang pawh sawiin he hmalakna kaltlang hian Mizoram District tina Hospital te tih changtlun leh thuam that mek zel niin 2017-18 leh 2018-19 hun chhungin Lunglei District Hospital tan cheng vbc 5.33 sengin hmanraw hrang hrang bun thar a nih thu a tarlang a. Lunglei chu Mizoram khawpui ber dawttu a nih avang leh chhimlam District dang Siaha leh Lawngtlai te tan pawha pan awlsam a nih avangin Sawrkarin a ngai pawimawh hle a, Civil Hospital Lunglei pawh thawihtawpa thuam that mek niin tih changtlun zel anih tur thu kalkhawmte a hrilh bawk.
Mizorama MBBS zirna in hmasa ber Mizoram Institute of Medical Education & Research (MIMER), Falkawn chu Mizoram tan hlawhtlinna ropui tak a nih thu leh, hriselna kawnga hmasawnna nasa tak a nih thu sawiin Lunglei thalaite pawhin fuihtu a hmanga zirlai tam zawk te he Medical College a zir ve thei tura inpuahchah turin a sawm a. Hriselna kawngah Mizote nasa takin hmasawnna tur kan nei a, dam duh chuan kan nunphung (lifestyle) kan uluk a tul a ni, a ti a. Mahni hriselna theuh ngaipawimawh a, ruihtheih thil laka fihlim piah lamah vaihlo zuk leh hmuam a filhlim te, mahni tlin tawk a ei leh in uluk leh nunphung tha neih tlan a pawimawh thu a sawi a ni.
He hun hi Dr T. Lalhmangaihi, Director, Health and Medical Education in a kaihruai a. Dr Zonunsiama, Consultant-in Technical Report pein Dr SR Ngurchamliana, Medical Superintendent, Lunglei Civil Hospital in lawmthu sawina hun a hmang a ni.
CT Scan hi North Eastern Council (NEC) kaltlanga Rs.2.28 crores senga lei niin ‘Siemens 16 Slice CT Scan’ a ni. He khawl hi Radiologist leh Technician ten an enkawl dawn a. User Charge tur pawh duang fel tawh niin Thluak enna (Brain Scan) man Rs.1500/- niin taksa hmun dang scan man chu Rs. 1000/- a ni ang.
NEDP kaltlangin 2017-18 leh 2018-19 hun chhungin Lunglei District Hospital tan cheng vbc 5.33 sengin hmanraw mamawh hrang hrang – X Ray Machine, Autorefractometer, Automated Blood Cell Counter, Defibrillator, C Arm Machine, Endoscope Machine, ICU Ventilator, ECG Machine, Colonoscope Machine, Ultrasound machine etc te lei a nih tawh a. NEDP kaltlang vek hian cheng vbc 5 sengin Staff Quarter Type IV Quarter Unit 6 leh Type III Quarter Unit 6 sak a ni dawn bawk a ni.
Cancer Care and Palliative Care Unit leh Blood Component Separation Unit (BCSU) te hi National Health Mission kaltlanga ruahman an ni. Emergency leh accident tawh palha lo enkawl zung zungna tur Trauma Centre hi sawrkar laipui Ministry of Health and Family Welfare kaltlanga cheng vbc 3.81 buatsaih tur a ni.
