INTERNATIONAL DAY AGAINST DRUG ABUSE & ILLICIT TRAFFICKING PUALIN AIZAWLAH HUN HMAN A NI
Ni 26.6.2017 khan khawvel pum a ruihhlo hmansual leh tawlhruk dona ni pualin vawiin khan Mizoramah chuan Vanapa Hall-ah Social Welfare Department leh Sorkar Department hrang hrang leh tlawmngai pawlte tangho buatsaihin hun hman a ni a. He hun hi Minister pahnih – Pu P.C. _, Social Welfare Minister leh Pu _, Health & Family Welfare Minister te bakah Parliamentary Secretary Pu _ ten an hmanpui. Kumin atan he ni puala thupui thlan chu “Ngaithla phawt rawh (Listen First)” tih a ni a. Him tak leh hrisel taka thalai leh naupangte an than theih nan an sawi tur neihte ngaihthlak sak nachang hre thin tura inchahna a ni.
“International Day against Drug Abuse & Illicit Trafficking” pual inkhawm a khuallian Minister Pu _ chuan Mizoramah ruihtheih thilin a tihbuai ve miahloh chhungkua kan awm ta manglo a ni tiin, ruihhlo hmansual laka inven a pawimawh thu leh, chutiang bawka ruihhlo vanga harsatna tawk mekte mumal tak leh kawnghmang nei taka enkawl tul a tih thu a sawi a. Zoram mipui mi nuai 11 vel awrh awmna zingah ruihhlo ti thin mi 25,000 vel awmin, chung zinga mi 10,000 chuang chu inchiu thin an nih thu te, Mizorama ruihhlo ngaite enkawlna hmun hrang 30 laiah englai pawha enkawl lai mi 2,000 bawr vel awm awm reng thu te Health Minister chuan a tarlang a. Chutiang anih avang chuan sorkar, kohhran leh NGO pawl hrang hrangten an tha thlah lova tan an lak deuh deuh a duh thu a sawi a ni.
Pu _ chuan ruihhlo vanga harsatna ramin a tawh mek chingfel turin ram dang mite kuta innghat mai lovin, a ram leilung fate ngeiin he harsatna avanga a nghawng thalo tuartu ngei kan nih angin, a sukiang tura tha thawhtu tur pawh keimahni vek kan ni tur a ni, a ti a. Dan lova ruihhlo tawlhru thin tu ten mimal leh khawtlang nun a tihchhiat a, pawikhawihna leh dan bawhchhiatna a thlen nasat thu hre rengin, heng mite lakah hian khawtlang pawh kan tan rual a tul hle a ni, a ti. Health Minister chuan ruihhlo do tur chuan heng kawng pawthum – ruihhlo tilo tura inzirtirna leh a ti tawhte pawh sim tura puihna leh zirtirna pek (Drug Demand Reduction Programme); ruihhlo ngai la sim mai theilo ten ruihhlo hmansual vanga natna emaw thil thalo leh pawi zawk an tawh lohna tura hmalakna (Harm Reduction Programme), leh; danin a phalloh ruihhlo zawrh leh tawlhruk ven mai bakah ruihhlo siamna leh a chinna hmun tihchhiat (Supply Reduction Programme) – ahte hian rualkhai taka tang tlanin hma lak a ngaih thu a sawi a. Sorkarin ruihhlo do kawnga a hmalakna hrang hrangte a tarlang bawk a ni.
Social Welfare Minister Pu P.C. _ chuan khawvel pum huap ruihhlo hmansual leh tawlhruk dona ni chu Mizoramah hman ve ngailo se tih chu duhthusam ni mahse hman ngai leh tul ber ram kan la ni chu thil lungngaihthlak tak a nih thu sawiin, hemi kawngah hian a kaihhnawih sorkar department, tlawmngai pawlte leh kohhran te bakah Zoram mipui awng zawngte kan tanrual a pawimawh takzet a ni, a ti.
Ruihhlo dona kawnga rualkhai zawka hmalak a nih theih nan Social Welfare Department chuan State level-ah Committee pawimawh pahnih – Chief Minister kaihhruaina hnuaiah High Level Monitoring Committee on Substance Abuse leh Chief Secretary kaihhruaina hnuaiah High Powered State Coordination Committee on Substance Abuse chu a din a. Ruihhlo hmansual venna ah enkawlna atan Standardized Module pahnih – Prevention Module leh Free Treatment Module chu Mizo tawnga siam a ni bawk. Ruihhlo venna kawnga hma latu ten tangkai zawka an kalpui theih nan ‘Drug Demand Reduction Policy’ chu duan niin, Law & Judicial Department leh Finance Department te endikna a paltlang tawh a, Council of Minister chuan September ni 21, 2016 pawm tawhin, sorkar notification nghah mek a ni. Mizoram chhunga ruihhlo hmansual ril zawng, a zia rang leh a kal phung hriat theih nan “Baseline Survey on Extent & Pattern of Drug Use” chu kum 2016-2017 chhung khan kalpui niin, kumin July hian tlangzarh tum a ni bawk a. Heng bakah hian Mizorama Dan dinglai te tichak lehzual turin Sorkar chuan “The Mizoram Drug (Controlled Substance) Bill 2016 chu duang in, December ni 7, 2016 khan Mizoram Legislative Assembly chuan a lo pawm tawh a ni.
International Day against Drug Abuse & Illicit Trafficking hi khawvel pum huapin kum tin June ni 26-ah hman thin a ni a. Kumin hian he ni hi sorkar chawlh a nih avangin Mizoramah chuan vawiin atan he ni pual programme chu sawn tak a ni. Vawiin hun hi Social Welfare Department Secretary Pu P. Lalchhuanga, IAS chuan kaihhruaiin, NGO atangin leh ruihhlo ngai dam kawng pan te atangin thusawi ngaihthlak tel a ni a. Dr. Lalnunthara, Director, Social Welfare Department chu lawmthu sawiin hun hi a khar a ni. Programme hi Social Welfare Department bakah Health Department, DC Aizawl, Excise & Narcotics, Mizoram Police, IG Prisons, School Education, MSACS, MRHG leh SCERT-te bakah heng pawl hrang hrang - State Child Protection Society, MDUF, FINGODAP, Life Code leh MSD&RB te tawnghovin an buatsaih a ni a. Sorkar department hrang hrang hotute leh tlawmngai pawl leh kohhran aiawhte bakah zirlai naupangten hun hi an hmang a ni.
