Press Note
Vawiin May ni 9, 2023 chawhnu dar 2:30 khan Secretariat Conference Hall-ah One day Sensitization on Indian Public Health Standards (IPHS) 2022 neih a ni a, Pi Esther Lalruatkimi, IRS, Principal Secretary, H&FW in a hmanpui.
Vawiina One day Sensitization on Indian Public Health Standards (IPHS) hi Dr.Eric Zomawia, Mission Director NHM in Chairman niin a kaihruai a. Kalkhawmte lawmna thu hi Pi Esther Lalruatkimi IRS in a sawi bawk.
He hunah hian Dr. Zorinsangi, State Nodal Officer (Training) in presentation pe in, mipuite hriselna atana sorkar damdawi in, District Hospital atanga Sub Centre thlenga IPHS guidelines in a sawi thawktu awm zat tur leh an mawhphurhna te, hmanraw awm tur te leh a building sak dan tur bik a tih chungchangah te zirtirna a pe a ni.
Dr.Zorinsangi presentation-in a tarlan danin IPHS guidelines-ah chuan:
1. Mizoram ang tlangram-ah chuan mihring 3000 awmna zelah Sub Centre pakhat awm tura tih ani a, heng Sub Centre-ah hian Health Worker mipa leh hmeichhia pakhat zel awm tura tih a ni. Health & Wellness Centre-a hlan kai tawhah Health and Wellness Officer pakhat zel an awm bawk ang.
2. Primary Health Centre chu mihring 20,000 awmna chinah din tur a ni a, damlo khum pahnih atanga paruk thleng a awm ang. Community Health Centre (CHCs) chu mihring 80,000 tal awmna chinah din tur a ni, damlo khum 30 lai a awm tur a ni a, duhthusam chuan Medicine Specialist, Surgeon, Gynae Specialist, Pediatrician leh Anaesthetist pakhat theuh talin an thut chilh tur a ni. Tin, Mihring 1000 zel awmnaah damdawi in khum pakhat zel awm tur a ni a, khum pahnih tal a awm theih chu duhthusam a ni.
3. District Hospital atan chuan mihring nuai hnih chin awmnaah damdawi in khum 100 a awm tur a ni a, mihring nuai hnih atanga nuai nga awmna ah damdawiin khum 200 a awm tur a ni. Mizoram ah chuan damdawiin khum zat chu awm tha thawkhat mahse heng damdawiin ah te hian thawktu- doctor, nurse leh damdawi lam thiam awm tur zat IPHS in a duan ang dah tur zat leh infrastructure tul leh mamawh eng emaw zah a awm ngei ngei tur a ni tih a ni.
Vawiina Sensitization Workshop-ah hian hun hmanpuitu Pi Esther Lalruatkimi IRS, Principal Secretary chuan Health and Family Welfare department hnuaia thawktute chu IPHS ang thlap mahni facility a theuh hma la turin a fuih a. IPHS norms anga kal tur chuan tehfung pawimawh tak tak chhawpchhuahsak kan ni dawn a. heng tehfung te hi min delh rittu maia ngai lo va, chona-a ngai tur leh hneh thei ngei tura tan lak hi kan tih makmawk a ni. Chuvangin theih tawp i chhuah ang u a ti a ni.
