DIRECTORATE OF HEALTH SERVICES
MASS EDUCATION AND MEDIA SECTION
KAYAKALP LAWMMAN CHUNGCHANG INZIRTIRNA LEH KALPHUNG SAWIHONA HUN HMAN A NI.
Dated Aizawl the 27th July, 2017
Damdawi in faina leh kawng hrang hranga hmasawnna tur atana programme pawimawh tak Kayakalp chungchang sawihona leh lawmman chungchang training pawimawh tak mai, Awareness Workshop on Kayakalp and Dissemination of Guideline 2017-2018 leh External Assessors Training - for TOT of Kayakalp Tools chu July ni 27, 2017 (Ningani) chawhma dar 10:30 khan Civil Hospital, Aizawl Conference Hall-ah neih a ni.
Kayakalp Awareness Workshop hi Dr. Lalthantluanga Chawngthu, State Programme Manager, NHM in a kaihruai a. Training hawnna thu sawiin Dr. Lalthantluanga, Chawngthu chuan India rama Kayakalp kalpui dan chipchiar takin a sawi a. Kayakalp chu district tin te tana inelna a nih avangin thawktute theihtawp chhuah turin a chah bawk.
Hemi hnu hian Dr.R.Lalchhuanawma,State Nodal Officer, Quality Assurance, NHM chuan Mizorama Kayakalp kalpui dan chungchang a sawi ve leh a. Kumin 2017 atangin Kayakalp hi Urban Primary Health Centre-ah kalpui tan a nih tur thu te a sawi lang bawk a ni.
Dr.Lucy Chawisangzeli,State Consultant Quality Assurance chuan Award Criteria & Institutional Frameworks tih thupui hmangin zirtirna a pe a. Dr.Evelyn Lalremsangi Hmar, State Consultant Quality Asurance Process of Assessment & Award Declaration tih thupui hmangin zirtirna a pe bawk.
Kayakalp hi nikum 2015 atang khan Mizoramah kalpui tan a ni a. A tirah chuan District Hospital chauh huam tir a ni a. Kumin 2016 khan a huam zauh a ni ta a. District Hospital, CHC, PHC zawng zawng a huam hnu-ah kumin 2017 atang phei chuan Urban Primary Health Centre zawng zawng a huam tel tawh dawn a ni. Kayakalp hnuaiah hian Damdawi fai, nuam leh thianghlim, bawlhhlawh sawngbawl dan te bakah hospital kalphung felfai kawngah tehfung siam a ni a. Lawmman pawh tha tawk tak siam a ni bawk.
Urban PHC bikah hian tehfung hrang hrang hmanga teh a 70% mark hmuchinte tan Commendation Award Rs 50,000/- dawn theih a ni ang a, District Hospital ti tha berin Rs. 3 lakhs a dawng bawk dawn a ni. Tin, Community Health Centre leh Sub District Hospital ti tha ber hian Rs. 15 lakhs dawngin a dawttu in Commendation Award atan Rs. 1 lakh a dawn bakah District zawng zawnga PHC ti tha berin Rs. 2 lakhs dawngin pahnihna in Rs.50,000/-an dawng bawk ang.
Kayakalp lawmman hi kumin October ni 2nd, 2017 hian sem tura ruahman a ni. Tunah hian Kayakalp kalpuitu ten nasa takin tan an la chho mek zel a ni.
