Vawiin 30th March, 2023 (10:30AM) khan National Tobacco Control Programme leh Legal Metrology Mizoram te chuan te Mizoramah khauh zawka vaihlo khap a nih theih dan tur te, dan lo va cigarette lak luh (Contraband cigarettes) tihtawp a nih theih nana tan lakho zel a nih theih dan leh hmalaknate thlir hovin Administrative Training Institute (ATI) Conference Hall, MINECO-ah Consultative Meeting cum Training an buatsaih.
Vawiina Consultative Meeting cum Training hi Pu Laldawngliana, Joint Controller of Legal Metrology chuan Chairman niin a kaihruai a. Kalkhawmte te lawmna thu a sawi zawh hnu-ah Pu R.Lalremruata, Legal Consultant, NTCP hnen atangin Tobacco Control & Cessation "Vaihlo hman khapna dan leh a nghei duhte tana NTCP-in hma a lak pui dan" chungchang ngaihthlak a ni.
Hemi hnu hian Pi Vanlalzari, Legal Consultant National Tobacco Control, NHM in COTPA leh a hnuaia dan hrang hrang sawifiahin, mipui vantlang zinga mei zuk, kum tling lo hnena vaihlo hralh chhuah, meizuk promote zawnga advertisement leh sponsorship bakah zirna in hnaivaia vaihhlo kaihhnawih hralh chhuah phal loh a nih dan te sawifiahin presentation a pe a. Legal Metrology thawktuten inhawng taka vaihlo dona kawngah an hmalakna phur taka an thlawp thinnaah lawmthu a sawi a. A bikin contraband cigarette kan tih, dan lova khawchhak lam atanga cigarette lak luh man leh dap chhuah, tih riral kawnga Legal Metrology te hnathawh chu fakawm a tih thu a sawi bawk.
Pu Vanlalrema Hnamte, Assistant Controller of Legal Metrology chuan Package Commodities Rules relating to Tobacco Control tih thupui hmanga Presentation pein heng khawchhak lam atanga dan lova cigarette lak luh 60% lai hian Mizoram leh Manipur hi a paltlang a. Manipur aiin Mizoram hi kalkawngah hmang nasa zawk bawk. Kum 2016-ah ringawt pawh khan India cigarette atanga chhiah lak nuai 1475 let thum/li dawn laia tam dan lovin cigarette lak luh a ni. Ban phak maia cigarette awm hian naupang leh kum tling lo te zingah meizuk a ti hluar a. Heng Cigarette te hi a him lo bawk a, kan hriselna in tawrh phah hle a ti.
He meeting-a report petu Pu Lalramchhana, Inspector of Legal Metrology chuan, "Kum 2015 leh 2016 chho atang khan nasa zawkin Mizoram District 5-ah a bultan nan Cigarrete tihrem beihpui thlak a ni a. a hnu kum 2 chhung 2016 - 2018 inkar chhungah ringawt pawh district 8-ah Cigarette pack 166982 man a ni ta mai a. Hei hian Mizorama dan lova Cigarette hmanga sumdawnna hi a lian hle tih a tilang a ni," tiin "Kum 2022 - 2023 inkar chhung khan Mizoramah Cigarette pack 187340 man a ni a. Hei hi a sumfaia chhutin Rs. Nuai 150 chuang lai a ni. Heng thilte hi a remchan dan angin Legal Metrology te chuan an tichhe thin a ni." a ti bawk.
Chawhnu lamah kalkhawm ten sawihona hun an hman hnu-ah Pu Lalsawmliana, Assistant Controller-in Training khaikhawmna hun a hmang a. Dr.Lianthangpuia, State Nodal Officer, National Tobacco Control Programme-in lawmthu sawiin hun hnung a khar a ni.
