OFFICE OF THE DIRECTOR

DIRECTORATE OF HEALTH SERVICES

MINECO : AIZAWL

MASS EDUCATION & MEDIA SECTION

PRESS HANDOUT

No. 19/10/2023

 (Dated Aizawl the 1st October 2024)

(KUM UPATE PUALA NI BIK HMAN A NI)

Vawiin hi khawvel puma kum upate ni (International Day of Older Persons) a nih angin he ni pual lawmna inkhawm hi NHM hnuaia National Programme for Health Care of the Elderly (NPHCE) bultumin Central YMA Conference Hall Tuikhuahtlang-ah neih a ni a. Pi Sangchhin Chuinzah IAS, Secretary H&FW Department chu Khuallian a ni.

Vawiina Upate Ni pual inkhawm hi Dr. Vanlalsawma, Principal Director, H&FW-in kaihruaiin he huna kal khawm kum upate hnenah lawmthu sawiin anmahni lawmna hun a hmang a. Hemi hnu hian Pu Nghaklianmawia, President MUP General Headquarters hnen atangin  thusawi ngaihthlak a ni bawk.

Hemi hnu hian Upat leh Hriselna tih Thupuia hmangin Dr. Catherine Lalmuanawmi, State Nodal Officer, NPHCE chuan Presentation ngaihnawm tak a pe a. Dr Catherine chuan “India ramah hian kum upate hi kan pung chho tial tial a. Zir chianna in a tarlan danin Kum 2013 khan India ramah kum upa maktaduai 100 vel awmin kum 2021 khan 138 vel an awm tawh a. Kum 2050-ah chuan maktaduai 347 chuang tura ngaih a ni. Chuvangin WHO pawhin kum 2021 atanga kum 2030 inkar hi Decade with Healthy Living atan a lo puang hial a ni,” a ti.

Dr Catherine chuan, “Mizoramah hian mi nawlpui dam rei zawng (life expectancy) pawh tunah chuan a lo kang chho ve hret hret zel a. Tunah hian Mizo mipa dam rei zawng hi kum 68.3 niin hmeichhia hi kum 73 bawr ni a chhut a ni. Mizoramah hian mipui za zela 8 hi kum upa, kum 60 chin chung lam an ni a. Kum 80 chung lam pawh kan pung ve zel bawk a. Hei hi thil ropui tak pakhat a ni. Kum upate hlutna hi kan hriat chian leh zual a hun ta hle a. WHO pawhin kum upate tana insenso hi thil manhla tak a ni tih hria in hma a la nasa hle a. India sawrkar pawhin Nationah Health Mission hnuaiah kum upate enkawlna tur  pawimawh tak Programme National Programme for Elderly tih chu a duang chhuak ta hial a. He Programme hnuaiah hian Mizoram pawhin upa ten hriselna tha zawk an neih theihna turin kawng hrang hrangin hma a la mek a ni a ti.”  Tin, upate tan damdawiin tinah khum 10 reserve a nih dan te, district pali-ah kum upate pual liau liauva MMU leh Physiotherapy kalpui a nih dante bakah upa ten taksa mai bakah rilru hrisel an neih theih dan tur a zirtirna pawimawh tak tak a pe bawk a ni.

He huna thusawitu Pi Sangchhin Chinzah IAS, Health Secretary chuan thu tawi sawiin “Vawiina lo kal khawm MUP member duhawm tak takte hian in hlutna hi in man thiam lovang tih ka hlau a. Tawn hriat ropui tak tak neitu Upate hi kan ram tan in hlu a. Kan mamawh che u a. Upatna hrim hrim hi malsawmna a ni tih hre reng turin ka chah duh che u a ni,” a ti.

Vawiina Upate ni-ah hian MUP General Headquarters  hnuaia Aizawl huam chhung MUP Unit hrang hrang atangin MUP Member mi 200 chuang lai an kal khawm a. MUP Ramthar Veng leh Lalbiakhluni Artist ten zaiin kal khawmte an awih bakah Pu KL Thanmawia General Secretary MUP pawhin thusawina hun a hmang bawk.

Dr. Martin Chawngsailova State Programme Coordinator NP-NCD chuan lawmthu sawiin hun hnung hi a khar a ni.