OFFICE OF THE PRINCIPAL DIRECTOR HEALTH & FAMILY WELFARE DEPARTMENT
............................
MASS EDUCATION AND MEDIA SECTION
(PRESS HANDOUT)
DATED AIZAWL
The 28th November, 2019
LUNG NA ZAWN CHHUAHNA SCREENING
CONGENITAL HEART DISEASE BUATSAIH A NI
“RBSK hnuaiah nau piang hlim atanga kum 18 inkar mi sawmruk pahnih (62) ten Manipal Hospital-ah inenkawlna an dawng tawh”.
Vawiin November ni 28, 2019, Ningani chawhma dar 10:00 atang khan Health & Family Welfare Department hnuaia National Health Mission peng pakhat Rashtriya Bal Swasthya Karyakram (RBSK) leh Manipal Hospitals Bangalore-te tangkawp chuan a tum li (4)-na atan Aizawl West DEIC, Kulikawn-ah Congenital Heart Disease Screening Camp an buatsaih. He Screening Camp hi Dr. TC Hmingthangi, State Nodal Officer, RBSK/RKSK leh Dr. RL Nunthara, Paediatrician bakah staff dangten an ho va. Manipal Hospital Bangalore atanga lo kal, Dr. Lalchand H.Bandagi, Cardiologist, Dr. Rahul Co-ordinator leh Echo Technicians dang ten naupang lungna zawn chhuah hna an kalpui thung.
RBSK leh Manipal Hospitals, Bangalore-te hian ni 28, August 2017 khan naupang piantirh atanga lung natna neite enkalwna atan inremna an lo ziak fel tawh a. Tun dinhmunah nau piang hlim atanga kum 18 inkar mi sawmruk-pahnih (62) ten Manipal Hospital-ah hian enkawlna an lo dawng tawh a ni. RBSK hnuaiah hian nau pianghlim atanga kum 18 inkarte hriselna endik hna hi thawh thin a ni. Natna nei hmuhchhuah ten chu enkawlna tluantling an hmuh theihna tur hmunah rang taka enkawl an nih theih nan tirh thin an ni a. Piantirh ata lung natna neite inenkawlna tura inremna angin naupang zai ngaite chu Manipal Hospital-ah hian refer thin an ni. Hospital senso zawng zawng leh thlen man sawrkarin a tum thin a, ei leh in leh kalkawng man erawh mahni a intum tur a ni thung.
Vawiinah hian naupang 150 vel inentir an awm a. Tin, zai hnua in check-up tura lo kal an awm bawk. Vawiina naupang inentir zingah hian naupang lungna hi 70 chuang hmuhchhuah an ni a. Zai ngai hi mi thahnem tak an awm bawk a ni. Heng lungna nei zinga zai ngaite hi Manipal Hospital-ah a huhova thawn an ni anga, RBSK lam thawktu ten a tul dan ang zelin an buaipui leh dawn a ni.
Mizoramah hian RBSK Programme bik hi July 2013 atang khan kalpui tan a ni a. He Programme hnuaiah hian nausen pianghlim atanga kum 18 inkarte hriselna endik sak an ni thin a ni.RBSK hian natna 30 lai a huam a. Heng zinga natna 13 te hi enkawlna tur senso RBSK in an tumsak vek thei a, natna nei te zawn chhuah hna hi Hospital, CHC/PHC/ Sub Centre, Anganwadi leh School-ah te Mobile Health team ten an thawk reng a ni.
RBSK hotute chuan vawiina lung enna khawl phal taka rawn thawhtu Ebenezer Hospital Aizawl chungah leh naupang zai tura kalte theihtawpa lo buaipui thintu Bangalore Mizo Welfare te chungah lawmthu an sawi tak meuh meuh a ni.
