OFFICE OF THE DIRECTOR
DIRECTORATE OF HEALTH SERVICES
MINECO : AIZAWL

MASS EDUCATION & MEDIA SECTION

PRESS HANDOUT
Dated Aizawl the 11th September 2023
No. PH. 37-MEM/2023

MAHNI INTIHHLUM HLUAR ZEL VENNA NI WORLD SUICIDE PREVENTION DAY HMAN A NI.

(KUM 2011 - 2023 CHHUNGIN MIZORAMAH MAHNI INTIHLUM MI 1145 AN AWM TAWH)

Mahni intihhlumna hluar zel laka invenna leh in zirtirna ni World Suicide Prevention Day chu National Mental Health Programme bultumin vawiin September ni 11, 2023 chawhma dar 11:00 khan Taxation Department Auditorium-ah hman a ni a. He hun hi Dr. Vanlalsawma, Principal Director, H&FW in Khuallian niin a hmanpui.


Vawiina World Suicide Prevention Day puala hun hman hi Dr.Robert L.Khawlhring, State Nodal Officer (NMHP) in a kaihruai a. Chairman-in kalkhawmte lawmna thu a sawi zawhin Dr.Vanlalsawma, Principal Director H&FW hnen atangin mahni intihhlum chungchang leh kaihhnawihte bakah mahni intihhlum tumte thinlung leh ngaihtuahna a tha zawnga kaih her sak dan tur leh chumi atana thawktute pawimawhzia ngaihthlak a ni. Dr.Vanlalsawma Principal Director H&FW chuan "Mahni intihhlum duhna hi rilru lam harsatna a nih avangin kumbi thliah a awm lo va, mi tin chunga thleng thei a ni. Tin, a awmna chhan hi a tlangpuiin kan thil lo tih tawh leh tih lai mekin min vuak let avang te, chumi sawhkhawkin a thlen harsatnate pal chhuak zo dawn lo a inngaihna avang a ni duh hle. Chuvangin, hetianga harsatna nei te hian an harsatna hriatthiampuitu an mamawh a. An lakah dawhtheihna kan neih a ngai thin. Chuvangin, thawktute pawhin hemi kawngah hian hriatthiamna thuk zawk kan neih a ngai a ni" a ti.


Hemi hnu hian Keynote Address Dr.Ruth Lalmuanpuiii, Jt. Director DHME hnen atangin ngaihthlak a nih bakah Pi Lalbiaksiami Addl SP, DIG Northern Range hnen atangin Mizorama mahni intihhlumna thleng record leh data chungchang zir leh ngaihthlakho a ni bawk. Addl.SP Northern range report atanga a lan danin Mizoramah hian kum 2011 atanga kum 2023 (July) thla thleng khan mahni intihlum mi 1145 awmin chung zinga mi 954 te chu mipa an ni a. mi 191 te chu hmeichhia an ni thung. Data in a tarlan danin mahni intihhlumna hi kum 20-39 inkarah a tam ber a ni. Kuminah hian mahni intihhlumna hi tum 60 a thleng tawh bawk.


Mahni intihhlum tum mi beidawngte lo dawngsawnga, an harsatna leh buaina ngaihthlaksak tura Helpline pawimawh tak TeleMANAS chungchang tarlangin VL Muanpuii, Counsellor, TeleMANAS in hun a hmang leh a. TeleMANAS helpline no 14416 leh 18008914416 hmanga Counsellor leh thawktu dangte englai pawha biak pawh theih an nih thute a tarlang bawk.


Hemi hnu hian Dr.Juliet Lalremmawii, Assistant Professor, Hrangbana College hnen atangin tunlai thangtharte zinga mahni intih-hlumna thleng te leh chumi veng tura mitin mawhphurhna chungchang ngaihthlak a ni bawk.


Vawiina World SuicidePrevention Day hi Hrangbana College Psychology Department zirlai ten hun hmanpuiin kal an thahnem hle a. Zothansangi DMHP-in lawmthu sawiin hun hnung a khar a ni.