OFFICE OF THE DIRECTOR

HEALTH SERVICES : MINECO AIZAWL

MASS EDUCATION & MEDIA SECTION

PRESS HANDOUT


DATED AIZAWL : THE 30TH MAY 2025

PRESS HANDOUT NO: 9/5/2025


MIZO NU CHHUANAWM PI V.LALHMANGAIHI HNENAH PRESIDENT OF INDIA IN NURSE CHAWIMAWINA SANG BER FLORENCE NIGHTINGALE AWARD A HLAN.

 

Vawiin May ni 30, 2025 chawhma dar 11:00 khan Rastrapati Bhavan, New Delhi-ah India rama Nurse chawimawina sang ber National Florence Nightingale Award chu Droupadi Murmu, President of India-in Pi V.Lalhmangaihi, Nursing Officer, Civil Hospital Aizawl hnenah a hlan.


Vawiina he chawimawina inkhawm, Rastrapati Bhavan, New Delhi a neih hi  Droupadi Murmu, President of India-in a hmanpui a. India ram state hrang hrang atanga Nurse hnathawk tha leh chawimawi tlak mi eng emaw zah rualin he chawimawina hi hlan a ni.


Pi V.Lalhmangaihi’n National Florence Nightingale Award a dawnna chhan tlangpuite chu:

·         A duty-na hmun leh hmun dangah theih tawp chhuahin dam lote nunna a chhan chhuak.

·         Emergency dam lo na tak, an laka beisei nei miah lova ram pawna  hruaiin kawng tluanin a buaipui a, a tawpah an nunna a chhan him sak.

·         Cancer thawkna  dawt pipe vuah, thawkna dawt ping avanga thaw thei tawh lo nunna a chhan chhuak.

·         A hun laia kawng mumal awm lo Lawngtlai District Vartekkai khuaah hrileng vanga Medical officer hova ke a kalin, haw lama an team leader Medical officer chau tak mai tan theih tawp a chhuah a, a nunna chhan him a ni.

·         Mizoram sorkar hnuaia a ICU hmasa ber Civil hospital Aizawlah din a nih khan,  sulsutu leh tha leh zung seng nasa tak mai a ni a. District danga ICU hawn a nih dawn pawhin a nurse puite lo zirtirtu a ni.

·         ICU manual siamtute zingah a tel bawk a ni. ICU-a a thiamna hi a chhuanawm tak zet a ni.

·         Amah hi nurse thiam tak niin mi tlawmngai leh taima em em, mamawhtute tana eng lai pawha che chhuak thei zel mi a ni.

·         COVID -19 laiin Venghnuai khawtlang tan a tangkai em em a. Venghnuai Branch YMA buatsaihin COVID-19 chungchang, inven dan leh PPE hman dante zirtirin COVID-19 dona kawngah a thawk hlawk hle a ni.


Pi V.Lalhmangaihi hi tunah hian Aizawl Venghnuai a cheng mek a ni.


National Florence Nightingale Award hi Ministry of Health and Family Welfare, Government of India chuan kum 1973 khan nurse leh nursing professional-te’n khawtlang tana an rawngbawlna tha tak takte hriat rengna atan a din a ni. Mizoram chhunga thawk nurse mi 16 in he chawimawina hi an dawng tawh a. Kumin a dawngtu  Pi V Lalhmangaihi hi 17-na a ni. Mizo nurse, state pawna thawk pahnihin an dawng tawh bawk a ni.


He chawimawina hi Central, State/UT leh Voluntary Organisation hrang hranga thawk nursing personnel chhuanawm tak takte hnena hlan thin a ni. Damdawi in emaw, khawtlang emaw, zirna emaw, enkawlna hmun a  hna thawk tha bik, nunna chhanchhuah leh hun khirh tak kara hriat reng tlaka thawk nurse-te tan ram pum huapin he chawimawina hi hlan thin a ni.


He chawimawina dawng tur hian India ram state hrang hrang atangin nurse hna thawk tha bikte nominate a ni thin a, recommendation te chu Central Sorkar-ah thawn thin a ni. Central Sorkar chuan committee bik siamin dawng awma an ngaihte an lo thlang leh thin a ni.


Award hi Certificate of Merit, Cash Award Rs.50,000/- leh medal pek thin an ni. Tin, Mizoram sorkar chuan kumin atangin dan mumal tak siamin lawmpuina citation leh cash award Rs 50000/- a hlan bawk ang.