Vawiin August ni 29, 2023 chawhma dar 11 khan Mizoram College of Nursing (MCoN) chuan an hlawhtlinna changtu zirlaite hnena Graduation Certificate hlanna leh zirlai lut thar turte puala meidet (Lamp Lighting) hun an hmang a. He hun hi Pi Esther Lalruatkimi IRS, Principal Secretary H&FW in Khuallian niin hun a hmanpui.

Vawiina Graduation & Lamp Lighting Ceremony hi Rev.F.Lalsangkungan Pathian hnena a hlan hnuah MCON zaipawl ten Haleluiah Chorus hla hmangin zaiin kalkhawmte an awi a. Pi H.Lalhlimpuii, Nursing Suptd. MSCI-in Lamp Lighting Ceremony awmzia leh a tobul sawifiahna hun a hman zawh hnuah a kaihhruaina hnuaiah vek MCON Batch thar mi 34 ten bati chhiin Nurse thutiam an la a. Tin, L.Chhawnkima Proficiency Award latu mi 5 te hnenah chawimawina hlan a ni bawk. Hemi hnu hian Graduate thar mi 30 te hnenah Pi Esther Lalruatkimi IRS, Principal Secretary H&FW leh Dr.Vanlalsawma, Director of Health Services ten Graduation Certificate an hlan a ni.

He huna thusawitu Principal Secretary H&FW chuan thusawiin MCON zirlai te zinga 100% lai maiin an zirlai tha taka an pass chhuak thei leh MZU rank nei an awm hial chu lawmawm a tih thu a sawi a. Mizote hian ram dangah export tur em em la nei lo mah ila, Nurse profession-ah erawh kan chungnung hle a, Mizo nurse ram danga awmte sawisel tur an awm ngai lo chuan khawvel huap pawhin nursing-ah kan quality a tha a ni tih a tilang a ni tiin Nurse zirlai leh chhuak ta te chu damlote tana thlamuanpuiawm, Mizo Christian kan nihna chawi nung zeltu ni turin a fuih bawk.

Pi Lalchhanhimi, Principal MCON  report-in a tarlan danin din a nih atangin MCON hian nurse graduates 436 a nei tawh a, heng nurse-te hi India leh Foreign ram hrang hrangah an thawk mek a. MCON hian Mizoram zirlai mai bakah Prime Minister’s Scholarship Scheme (PMSS) hnuaiah Jammu & Kashmir leh Ladakh atangin zirlai  7 a nei mek bawk a ni. Mizoram University Exam a result tha tak neiin final year zirlaite zaah za an pass bawk a ni.