Vawiin khan Mizorama MBBS zirna in hmasa ber Mizoram Institute of Medical Education & Research (MIMER), Falkawn chu Chief Minister Pu _'n khuallian niin a hawng. Finance Minister Pu _, Health & Family Welfare Minister Pu _ leh Agriculture Minister Pu _ te chu khualzahawm an ni a. Speaker Pu _, Home Minister Pu _, Higher & Technical Education Minister Pu R. _ leh Sports & Youth Services Minister Pu _, leh MLA engemawzah an tel a ni.
Chief Minister chuan vawiinah hian Mizoram mipuiin rahbi thar kan kai a ni tiin, MIMER hlawhtlinna atana hmalatu zawng zawng chungah lawmthu a sawi a. Mizorama Medical College hmasa ber a ding ta chu mi hrang hrang thawhhona leh tanrualna rah a nih thu sawiin, MIMER hi roreltu sawrkar ta bik a nilo a, Mizo mipui zawng zawng ta a ni, a ti. Hmabak la tam viauin, tunah hian medical college dinhmun chu duh angin la changtlung tawk rihlo mahse India ram a college tha ber siam tura bultanna a ni a ti a; 'Bul tan that hi a chanve zo ang a ni' an tih angin, chumi atan chuan faculty member-te leh zirlaite an pawimawh thu khuallian chuan a sawi a, thahnemngaia theihtawp chhuah zel turin a chah a ni. Chief Minister chuan ram hmasawnna chu mipui hriselnaah thui tak a innghat a, khua leh tui hriselna mai piah lamah, inenkawlna hautak lo leh awlsam zawk an hmuh chu sawrkarin a duh sak thu a sawi a. Hun kalta khan District Hospital tin te chu hmanrua tul leh pawimawh a thuam tura hmalak thin a nih dan te, chumi rual a damlo na zual ten phaia inenkawlna dawng tura an kal ngai kher lovin, hautak lo zawka mahni kawtkaia referral hospital an pan tur neih pawimawhna hria in, tuna MIMER behchhan hospital, State Referral Hospital, Falkawn chu din tak a nih thu te a sawi a. Tichuan hun rei tak beiseina nen a kan lo nghahhleh Medical College tuna kan nei thei ta hi a lawmawm hle a ni, a ti. Chief Minister chuan hriselna kawngah Mizote nasa takin hmasawnna tur kan nei a ni tiin, dam duh chuan nun uluk peih a tul thu a sawi a. Mahni hriselna theuh ngaipawimawh a, ruihtheih thil laka fihlim piah lamah vaihlo zuk leh hmuam a filhlim te, mahni tlin tawk a ei leh in uluk leh nunphung tha neih tlan a pawimawh thu a sawi a ni.
Khualzahawm Health Minister Pu _ chuan harsatna hrang hrang karah bul tan ni mahse a, thawhhona tha tak nena chawl lo a kal zel avangin vawiinah hlawhtlinna kan lawm thei ta a ni, a ti a. February 2014 khan Sawrkar laipui chuan ‘Establishment of New Medical Colleges with Existing District /Referral Hospitals’ tih project hnuaia, Hospital 58 zingah State Referral Hospital Falkawn chu Medical College dinna tur atan Mizoram chu pawmpuiin, he project hi an sanction ta a. Project cost hi cheng vaibelchhe 210 a chhut niin, chumi atang chuan cheng vaibelchhe 189 chu Ministry of Health & Family Welfare in an thawh tur a ni a. Chuta tang chuan theih ang tawka chaka hma lak tak a nih thu a sawi a. Health Minister chuan Medical College din tur tan MCI duh dan a khirh a, tlin pawh a har a, MCI duhdan tlin turin fund leh mithiam mamawhna a lian bawk a ni tiin, chumi atana sawrkar hotute hriatthiamna leh duhsakna chungah lawmthu a sawi a. Medical College din chu thil namai a ni lova, uluk taka ngaihtuah a, tha leh zung, sum leh pai, thiamna leh theihna tam tak sen ngai a ni a; Medical College din a nih theih nan Department hrang hrang leh, Department chhunga thawhhona tha tak neih avang chauhin a hlawhtling thei a ni tiin Pu _ chuan eng pawh ti dawn ila hlawhtling tura thawhhona pawimawhzia chu Mizoram mipuiin hre thar leh tura a duh thu a sawi a. College a lo changtlun zelna tura mawhphurtu zawng zawngte’n tha thlah lo a, ngaihtuahna thar nen hma la chhunzawm zel turin a chah a; thawktu zawng zawngte chu MIMER tan theihtawp chhuah tur a ngen in, batch hmasa ber ten hlawhtlinna an chan ngei a duhsakna a hlan bawk a ni.
Khualzahawm Finance Minister Pu _ chuan vawiina thil thleng chu Mizoram hmasawnna mellung kan theihnghilh ngai tawh loh tur kan phunna a ni, a ti a. Mizoram tan hlawhtlinna ropui tak a nih thu leh, hriselna kawnga hmasawnna nasa tak a nih thu a sawi a. Hmabak tam tak a la awm tih hriain, chumi atan chuan thawktu leh zirlai bakah mawhphurtu dang zawng zawngte thahnemngai leh tangrual taka thawk zel turin a duhsakna a hlan bawk a ni.
Khualzahawm Agriculture Minister Pu _, Falkawn leh a chhehvel bialtu MLA ni bawk chuan Falkawnah Hospital changtlung tak bakah Medical College hial a ding ta chu lawmawma tih thu sawiin, "mahni ramah ngei medical college kan hawnna ni hi Mizo History a lang reng tawh tur a ni" a ti a. Minister chuan Medical College a lo puitlin theih nan a kalkawngah harsatna hrang hrang sut tlang tur a awm thu te, chutiang zawng zawng pal tlang tura sawrkar hotute inpekna ropui a tih thu a sawi a. Thawh tur tam tak a la awm avangin rim takin tha sen a la tul thu te sawiin thawktu zawng zawngte tang chhunzawm zel turin a chah a. MIMER chhehvela chengte pawimawh thu sawi bawkin, state pawn leh ram pawn amite thiamna zir tura lo kalkhawmna hmun a nih dawn avangin zonun zemawi lo lantir thin turin a chah bawk a ni.
Vawiin MIMER hawnna inkhawm hi Chief Secretary Pu Arvind Ray chuan kaihruaiin, state a nih tirh a hriselna lamah inenkawlna nei tha lo hle mahse Mizoram chuan tunah hriselna lamah nasa taka hmasawn in Medical College a din thei ta hial chu hlawhtlinna ropui tak a ni tiin, Mizo thalai doctor leh medical thiamna zirchhuak ten an thiamna chu Mizoram tan hmangtangkai zui zel se a duh thu a sawi a ni. Pu _ Fanai, Commissioner & Secretary, H&FW chuan report pe in, Prof. L. Fimate, MIMER Director chuan lawmthu sawiin hun a khar a ni.
Mizoram sawrkar chuan state chhunga Medical College a neih ve theih nan August ni 29, 2014 khan Ministry of Health & Family Welfare-ah dilna a thehlut a. MCI chuan 2017 January ni 5 leh ni 6 khan inspection hmasa ber rawn neiin, objection engemawzah an nei a. Dilna hi thehluh leh nawn thin niin, MIMER hi phalna pek a nih hma in Medical Council of India (MCI) chuan enfiahna, Inspection Visit neiin an lo kal thin a. MCI in enfiahna an neih hnuhnun ber chu April ni 4, 2018 khan niin, Ministry of Health and Family Welfare hnenah MIMER tan Letter of Permission pe turin May ni 15 khan rawtna an thlen a. MoHFW chuan MIMER-a MBBS zirlai 100 tan phalna, Letter of Permission (LoP) chu academic session 2018-19 atan May ni 25, 2018 khan a pe ta a ni. July thla atang khan NEET UG Exams 2018 kaltlangin admission tih tan a ni a; Seat allotment hi Mizoram sawrkar hnuaia H&TE Department in kalpuiin, 15% chu NRI (Non-resident Indian) tana dah in, 15% dang leh chu Central Pool atan dah a ni a, a bak zawng 70% chu state quota a ni. Tunah hian zirlai in admit mi 62 state quota hnuaiah an awm tawh a, NRI quota ah mi 11 in admit tawh bawkin, Central Quota atangin mi 6 an in admit tawh bawk a ni. MiMER a zir tur in admit theih hun hnuhnung ber chu August ni 30, 2018 a ni.
MIMER hi College Wing leh Hospital Wing ah then niin, College Wing-ah chuan: Academic Building - - Administrative office, Dept. of Biochemistry (5 practical laboratories), zirlai 50 lenna Demonstration Rooms, Faculty Room te leh 800 metre bial a zau Library te a awm a; Anatomy Building building chhungah - Faculty rooms, Demonstration room 2, Dissection Hall, Museum leh Histo-pathology laboratory leh Lecture theatres pahnih a awm a. Zirlai 100 te awmna tur Hostel Quarter Complex ah siam a ni bawk.
Hospital Wing lamah khum 250 awmin, Clinical Department hrang hrang awmte chu General Medicine, Paediatrics, Tuberculosis &Respiratory Diseases, Dermatology,Venereology & Leprosy, Psychiatry, Gen. Surgery including Pediatric Surgery, Orthopedics (Bone & Joints), Ophthalmology, Oto-rhino-laryngology (ENT), Physical Medicine & rehabilitation, Dentistry te an ni a. Central Laboratory ah pathological, biochemical leh microbiological investigation a tih theih vek a.Khum 10 awmna Emergency Department & Casualty block, Major Operation Theatre 4 leh Minor OT 2, Endoscopy leh Bronchoscopy Unit, Dialysis Unit te awm bawkin ICU khum 20 awmna leh Blood Bank pawh siam mek a ni a. Radiology Department ah X-Ray khawl pali leh Ultrasound khawl 2 awmin, tunah hian khawl dang mamawh te lei mek a ni bawk.
MIMER a thawktute hi Direct Recruitment a lak leh Deputation a sawrkar department dang atanga kal an awm a. Teaching Staff ah Professor 4, Associate Professor 4, Assistant Professor 31, Senior Resident 10, Demonstrator 14 leh Junior Resident 17 an ni a. Non Teaching Staff te chu Registrar 1, Asst Registrar 1, Finance Officer 1, Veterinary Officer 1, Ministerial Staff 23, Audio-Visual staff 1, Photographer 1 leh Group D staff 46 an ni. Nursing Staff zingah Nursing Superintendent 4, Ward Superintendent 31 leh Staff Nurse 141 an awm a. Technical Staff te chu Lab Technician 24, Lab Assistant 9 leh CSSD Technicians 4 an ni.
