OFFICE OF THE PRINCIPAL DIRECTOR
GOVERNMENT OF MIZORAM
HEALTH & FAMILY WELFARE DEPARTMENT
PRESS HANDOUT
Dated Aizawl the 20th May, 2019
MIZORAMAH ROTAVIRUS VACCINE HMAN TAN A NI DAWN TA
Vawiin May ni 20, 2019 khan Directorate of Health Services, Conference Hall-ah Rotavirus Vaccine Introduction Workshop neih a ni.
He workshop hi Dr.Lalzawmi, State EPI Officer-in a kaihruai a. Mission Director, NHM Dr Eric Zomawia`n keynote address sawiin kalkhawmte lawmna a thu a sawi bawk. Dr Eric-a hian Health dept chhungah hmalakna leh hmachhawp hrang rangte a tarlang a ni. Hemi hnu hian UNICEF, North East atangin Dr. Tudhar Rane, Chief of Field Office chuan Rota Virus vaccine introduction a tulna leh India ram state hrang hranga he vaccine pek a lo nih tawh dante chipchiar takin a sawi a. Hemi hnu hian powerpoint presentation hmangin State Immunization Officer Dr. Lalzawmi`n Overview of Universal Immunization programme chungchang a tarlang bawk a ni.
Rota Virus vaccine hi state level leh district level training-te zawh fel a nih hnuah June thla emaw July thla 2019 kum chhunga pek tan tura ruahman a ni.
Rota virus vaccine hi naupang kar 6, kar 10 leh kar 14 a upa te dose 3, far 5 zela pek thin tur a ni a. Medical mi Rota virus chungchanga training nei ten vaccine hi naupang an pe tur a ni. Northeast state zingah Tripura leh Assam ten he vaccine hi a hmalamah an lo pe tan tawh a. Tun dinhmunah chuan Mizoram bakah NE state dang la pek lohna zawngah pek tan turin Ministry of Health & Family welfare, Govt of India chuan ruahmanna a siam a ni.
· Rota virus vaccine hi vaccine dang chi hranghrang Health Dept-in a pek thin (Routine Immunisation) a tel tur a ni.
· He Rota virus hi kawthalo natna thlentu tam ber a ni a, Naupang damlohna leh damdawiin hial thlen thintu a ni bawk. A natna enkawlna atan chhungkua a sum tam tak sen ralna bakah thihna hial thlen thei a ni bawk.
· He Rota virus vaccine hian rota virus avanga naupang kawthalo natna thleng tur lakah 40 % atanga 60 % in a veng thei bawk.
· Rota virus vaccine hi Routine immunization ( A nawlpuia vaccine pek thin) zingah khawvel ram 96 ten an telh tawh a. Private hospital leh private medical mi ten kum tam tak chhung he vaccine hi an lo pe tawh a ni.
· He vaccine hi a scientific taka WHO position paper-in him tawkah a puang tawh bawk.
Mi tu pawhin ngaihngam taka naupang hnenah Rota virus vaccine hi pe tur leh hemi kawnga health dept hmalaknate a theih ang anga tawiawm a pawimawh thu Health department lama mithiam ten uar takin an tarlang a ni.
He workshop hi Training of Trainers ni nghalin, news media hrang hrangte, WHO leh UNICEF represent te, Zoram Medical College aiawhte, District Immunisation Officer te, District zawng zawng atangin Medical Officer te, Nursing School hrang hrang Tutor te, Serkawn Hospital aiawh bakah state NHM a officer pawimawh leh staff thahnem tak an tel kim hle a ni.
Technical Resource Person atan Dr. Lalhlimpuii, Dr. RK Lalthlamuana, Dr. Lalrinthangi, R. Lalmuankima, Er. Vanlaldingheta ten subject pawimawh hrang hrang hmangin training hi pe a, Ruahmanna ang chuan naktuk May ni 21 hian chhunzawm leh a ni ang.
