Nimin June ni 3, 2019 kha Khawvel puma Ke Lek (Club Foot) te puala ni bik. World Club Foot Day a nih angin hemi ni puala inkhawm hi tlai lam dar 4:00 khan Aijal Club-ah neih a ni.

He hun hi Rev Dr.V.Kapenga'n kaihruaiin Captain Charles Chalrimawian hunserh  a hmang a. Pi Zohmingthangi Sailo, Chairman Cure Clubfoot Mizoram chuan Cure Club foot kalphung leh Mizorama bultan a nih dan te sawiin hun a hmang a. Hemi hnu hian Dr.Lalnghakliana, Orthopedic Surgeon, Civil Hospital-in Kelek awmzia leh enkawl dan powerpoint presentation hmangin a pe bawk. Dr.TC Hmingthangi, State Programme Officer (RBSK) pawhin thusawina hun hmangin RBSK leh Cure Club Foot ten thawhhona tha tak an nei chu lawmawm a tih thu a sawi a. Pu JC Zonunsangan Naupang ke lek chhungte kawmna hun a hman hnuah Nl. Zothanpuiii hnen atangin reports ngaihthlak a nih leh a. Pi Maria Lalnunmawii, State Co-ordinator, RBSK in lawmthu sawiin hun hnung a khar a ni.

Cure Club Foot Mizoram hi kum 2012 khan Mizoramah din tan a ni a. India rama Kelek buaipuitu pawl Cure International Indian Trust (CIIT), Miracle Feets leh CPM te nen pawh thawhhona tha tak an nei nghe nghe. Kum 2012 August thla-ah Health Department nen thawhhona thuthlung siamin hemi atang hian Civil Hospital Aizawl-ah Clubfoot Clinic pawh ningani apianga hawn a ni chho ta a ni. Tichuan Mizorama RBSK Programme kalpui a nih chhoh hnu-ah November ni 13 (zirtawpni) 2015 khan RBSK nen mumal zawkin thawhhona neih chhunzawm a ni chho ta zel a ni. Tun dinhmunah hian Mizoram chhungah naupang kelek 73 lai hlawhtling taka enkawl dam an lo ni tawh a ni. 

CCM Chairman Pi Zohmingthangi chuan, "Ke lek hi enkawl dam theih a nih bakah nausen pianghlimah phei chuan damna chance a sang em em a. Chuvangin, ke lek ten enkawlna an dawn theih nana tanpui leh hetiang mi dapchhuah kawngah hian nasa zawkin tan i la thar leh ang u" tiin kalkhawmte a fuih a. Tin, Health Department RBSK programme te nen MoU an sign chu hmasawnna lawmawm tak a nih thu sawiin Kelek chungchanga harsatna neite tan hian englai pawhin Helpline No. 8974054839 ah zawhfiah theih reng a ni a ti bawk.