OFFICE OF THE PRINCIPAL DIRECTOR

GOVERNMENT OF MIZORAM

HEALTH & FAMILY WELFARE DEPARTMENT

PRESS HANDOUT

Dated Aizawl the 10th May, 2019

NAUPANG LUNG NATNA NEI ZAWN CHHUAHNA SCREENING CAMP NEIH A NI. 

Vawiin date 10^th May 2019 chawhma dar 10:00 khan National Health Mission hnuaia Rashtriya Bal Swasthya Karyakram (RBSK) leh Manipal Hospitals Bangalore tangkawp chuan District Early Intervention Centre (DEIC) Kulikawn Aizawl-ah Screening Camp for Congenital Heart Disease (pian tirh atanga lung natna nei endikna) an buatsaih a. Dr.T.Lalhmangaihi, Director of Hospital & Medical Education chuan Khuallian niin hun a hmanpui.

He Screening Camp hawnna inkhawm hi Dr.Eric Zomawia, Mission Director, NHM in a kaihruai a. Chairman-in kalkhawmte lawmna thu a sawi zawh hnuah Dr. TC Hmingthangi, State Nodal Officer, RBSK/RKSK in Technical Report a pe a. Dr.Lalchand H Bandagi, Consultant, Manipal Hospital Bangalore hnen atangin thusawi ngaihthlak a ni bawk. Dr. Lalchand H.Bandagi chuan Mizorama Screening neia lo kal chu nuam a tih thin thu leh lung natna neitu mizo mipuite harsatna chu theih ang anga sutkian sak zel an inhuam thu a sawi bawk.

Thusawitu dang Khuallian Dr.T.Lalhmangaihi pawhin Manipal Hospital leh RBKS tena sawrkar kaltlanga thawhhona tha tak an nei chu lawmawm a tih thu sawiin nakin lehzel atan pawh he an thawhhona hi nghet taka neih chhunzawm zel a tul thu a sawi a. Kalkhawmte pawh tangkai taka screening camp hmang turin duhsakna a hlan bawk a ni. He hawnna inkhawm hi Dr.H.Lalchungnunga, Director of Health Services chuan lawmthu sawiin hun hnung a khar a ni.

Mizoramah hian RBSK Programme bik hi July 2013 atang khan kalpui tan a ni a. He Programme hnuaiah hian nausen pianghlim atanga kum 18 inkarte hriselna endik sak an ni thin a ni.RBSK hian natna 30 lai a huam a. Heng zinga natna 13 te hi enkawlna tur senso RBSK in an tumsak vek thei a, natna nei te zawn chhuah hna hi Hospital, CHC/PHC/ Sub Centre, Anganwadi leh School-ah te Mobile Health team ten an thawk reng a ni.

Tin, August ni 28, 2018 khan Manipal Hospital, Bangalore leh RBSK te hian thawhhona thuthlung an ziak a. Vawiin thleng hian Manipal Hospital-ah hian naupang lungna nei 42 lai hlawhtling taka zai an ni tawh a. Heng inzaina senso zawng zawngte hi RBSK sum atanga pek niin an zinna leh thlenna erawh chu mahni intum a ngai thung a ni. Congenital Heart Disease hi enkawl dan tur dik taka enkawl an nih chuan harsatna nei zui lovin hrisel takin an dam a, hetiang a nih avang hian pian tirh atanga lung natna nei an ni leh ni lo tih hmuchhuak tur hian screening hi buatsaih thin a ni.

Vawiin Screening-ah hian naupang 135 chuang lai endik an ni a, he thu buatsaih lai hian lungna nei mi 55 chuang hmuh chhuah an ni a. heng lungna nei zinga zai ngaite hi Manipal Hospital-ah a huhova thawn an ni anga, RBSK lam thawktu ten a tul dan ang zelin an buaipui leh dawn a ni.