OFFICE OF THE PRINCIPAL DIRECTOR
HEALTH & FAMILY WELFARE DEPARTMENT
MASS EDUCATION & MEDIA SECTION
Dated AizawlThe 3rd April, 2018
NATIONAL HEALTH MISSION HNUAIA ASHA LAK THAR MI 21 TE TAN INDUCTION TRAINING NEIH A NI
April ni 2 atanga ni 8 thleng awh tur, National Health Mission (NHM) hnuaia Accredited Social Health Activist (ASHA) lak thar mi 21-te puala buatsaih Induction Training chu Vawiin April ni 3 (Thawhlehni) 2018 hian Youth Hostel Luangmual, Aizawl-ah tan a ni a. Dr. Lalrozama IAS, Mission Director, National Health Mission chuan Khuallian niin hun a hmanpui.
He Induction Training hawnna hun hi Dr. R.Lalchhuanawma, State Nodal Officer, Community Process, NHM in a kaihruai a. Chairman hian ASHA lak tharte lawmna thu sawiin report a pe nghal a. Hemi hnu hian Dr.Lalrozama IAS, Mission Director, NHM chuan Training kalkhawmte hnenah ASHA Programme lo kalpui tawh dan leh hriattur pawimawh te a sawi a. Khuallian chuan "ASHA te tan hian vantlang hriselna kawngah hna tam tak thawh tur a awm a, in kutah hian nasa takin vantlang hriselna hi a innghat a ni tih hria u la ka duh a ni" tiin Central lam atanga min rawn hmuh dan chu ASHA te activities-ah a innghat thui em em a, hetiang a nih avang hian reporting-ah fimkhur leh uluk taka thil tih a ngai a ni a ti bawk.
Mission Director chuan kum kal ta lamah National Health Mission-in sum leh paiah harsatna namen lo kan tawh avangin ASHA te pawhin incentives an hmu tha tawk lova, he harsatna sukiang tur hian nasa taka tan lak a ni a, tunah hian incentive pawh felfai taka pek chhuah a ni thei tawh dawn a. Hei hi thil lawmawm tak ni a a hriat thu a sawi bawk.
Dr.R.Lalchhuanawma, SNO, Community Process in a tarlan danin Mizoramah hian ASHA hi kum 2006 atanga kalpui tan a ni a. Tunah hian Mizoram pumah ASHA 1091 an awm mek a. ASHA enkawl tur bik ASHA Mobilizer mi 109 awmin, ASHA Coordinator 9 awm mek a ni tiin ASHA te tih tur leh mawhphurhna hrang hrangte tarlang telin sawrkarin hamthatna a pek te a sawi lang tel bawk a ni.
He Training hian April ni 8 thleng a awh a nga, Hemi chhung hian State ASHA Trainers ten Nau piang hlim hriselna, Nu leh nau hriselna, Khawtlang hriselna leh thupui pawimawh tak tak dang thlanchhuah hmangin ASHA te hi zirtirna an pe thin dawn a ni.
