OFFICE OF THE PRINCIPAL DIRECTOR
HEALTH & FAMILY WELFARE DEPARTMENT
(MASS EDUCATION AND MEDIA SECTION)


(PRESS HANDOUT)

DATED AIZAWL 
THE 5th July, 2018

Vawiin 5th July 2018 chawhma dar 11 khan Social Welfare Department leh Health department hotuten Health Directorate Conference Hall-ah Programme for Convergence Meeting on Pradhan Mantri Matru Vandana Yojana (PMMVY) an nei.

He Convergence Meeting hi Dr.C.Zirliana, Joint Director (Planning)in a kaihruai a. Pi VANLALPIANPUII, Joint Director, SWD in keynote address pe in, Social Welfare leh Health Department chu department inngheng hnai tak an nih avanga thawhhona tha tak nena kal dun a tul thu te a sawi a. Hemi hnu hian Pi Zoramthangi Chhangte, Dy.Director (ICDS) leh Pi. Brenda Lalrindiki, State Programme Coordinator, (PMMVY) ten Powerpoint Presentation hmangin Orientation training an pe a. Discussion period-in zuiin sawihona hun tha tak neih chhunzawm nghal a ni.

PMMVY hi hun hmasa lamah IGMSY ti a hriat niin Mizoramah hian lawngtlai district huamchhungah kalpui a lo ni tawh thin a. 1st january, 2017 khan Prime Minister-in PMMVY ti a thlakin kalphung thar changtlung zawk nen kalpui a lo ni ta a ni. He programme hnuaiah hian Naupai lai leh Hnute pe lai ten an fa tir-ah hamthatna Rs.5000/- an dawng thei dawn a. He tanpuina sum hi vawi khatah dawng nghal lovin tum thum (3) ah an dawng thung dawn a ni. PMMVY dilna forms te hi Anganwadi Centre ah a thlawn in a lak theih a ni.

Hamthatna dawng tur hian Nu in nau a pai atanga ni 150 chhungin Aganwadi Centre-ah a in register anga, Diltu leh a pasal hian Aadhaar card emaw, voters ID emaw an nei tur a ni a, nau pai hian ama pualin bank account a nei tur a ni a, Aadhaar nen a thlunzawm tur a ni bawk. Tin, Mother & Child Protection Card neih ngei ngei a ngai bawk a ni.  He programme hian Sawrkar hnathawk leh nau neih senso bill theihna hmuna thawkte a huam lova, Fa pahnihna pai emaw fa pakhatna aia tam nei tawhte a huam ve lo bawk. 

He programme hian a tum ber chu nu leh naute hriselna ngaihpawimawh a ni, inhlawhfa leh kut hnathawk miten naupai lai leh nau neih hnua ei tur tha zawk, inentirna tur sum leh hahchawlhna tam zawk an neih theihna tur te, mahni hriselna ngaih pawimawh nachang an lo hriat a, damdawiina nau neih pawimawhzia an hriat theihna tura duan a ni.