OFFICE OF THE DIRECTOR,

HEALTH SERVICES : MINECO AIZAWL

MASS EDUCATION & MEDIA SECTION

PRESS HANDOUT

DATED AIZAWL : THE 26^TH SEPTEMBER 2025

PRESS HANDOUT NO: 6/9/2025

World Day of the Deaf : 26^th September, 2025

                    Bengngawng te Ni hi vawiin September ni 26, 2025 hian Mizoramah National Programme for Prevention & Control of Deafness (NPPCD), National Health Mission (NHM) chuan a vawi 11 na atan hman a lo ni leh ta a, Directorate of Hospital & Medical Education Auditorium,  MINECO ah Dr. Robert L. Khawlhring, Deputy Director (Prog.), DHME leh State Nodal Officer, NPPCD kaihhruaina a hun hman a ni. He hunah hian Pi Vanlaldiki Sailo, Commissioner, Person with Disabilities (PwD) chu khuallian a ni.

            World Day of the Deaf hi kum 1958 September thla atang khan hman a lo ni tawh thin a. Geneva Headquarter in a rel ang in he Ni hian a tum ber chu  Bengngawng te harsatna hriatthiam pui tur leh bengngawnna ti tlem tura mipui te hnena zirtirna zau zawk a theh darh hi a ni.  Hei bakah hian Zaizir a inbiakna tun aia hman uar te, bengngawng te tan inkiltawihna ti zia awm tur a hmalak te hi a tum ber a ni a.

            WHO in a zir chianna ah chuan Bengngawnna hi kan thil hriatna 5 (sensory organs)  zinga piansualna ah a tam ber a. Tunah hian khawvel pum pui ah mihring tluklehdingawn 1.5 (1.5 billion) vel hian ri hriatna chaklo an nei a, heng zinga maktaduai 430 te chu an beng a ngawng a, tun ang zela kan kal chho anih chuan kum 2050 ah chuan mihring 10 zel ah 1 hi an beng a ngawng dawn a chhut a ni. Hetiang anih avang hian kan beng hi kan enkawl uluk a ngaiin bengngawnna thlentu hrang hrang lakah kan in ven fimkhur a ngai hle a. Beng natna chi hrang hrang bakah damdawi beng ri hriatna chaklo thlen thei lakah te leh Ri bengchheng nasa lakah te kan inthiar fihlim a pawimawh hle a ni.

            World Day of the Deaf denchhen hian Interschool Speech Competition huaihawt a ni a, He hunah hian Higher Secondary School 10 telin, mi 16 ten intihsiakna hi an nei a ni. Lawmman 1 na hi Ms. H. Vanlalngaihawmi, Class IX ‘E’ St. Pauls Higher Secondary School ni in, Lawmman 2 na hi Ms. B. Lalhmangaihzuali, Class XI, Providence Higher Secondary School a ni a. Lawmman 3 na hi                  Mr. Malsawmtluanga, Class XII ‘F’, Synod Higher Secondary School ni in, Consolation  Prize hi mi 13 hnenah hlan an ni.

            He mi kawnga hma la tur hian  National Programme for Prevention and Control of Deafness (NPPCD) chu kum 2014, August thla atang khan Mizoramah pawh National Health Mission hnuaiah  din tan a ni a. Tun April 2025  atanga July 2025 thlenga record in a tarlan danin NPPCD hnuaiah hian Damlo mi 11,166 en niin Bengngawng mi 2029 hmuhchhuah an ni a, beng natna nei mi 2517 en an ni tawh a, Bengdar hi mi 43 hnenah pek niin mi 642 chu bengdar dawng turin refer an ni bawk a ni. Hemi kawngah hian RBSK (Rashtriya Bal Swasthya Karyakram), NILD - NERC ALIMCO te nen bengdar sem kawngah hian an thawk ho mek bawk a ni.