OFFICE OF THE PRINCIPAL DIRECTOR
HEALTH & FAMILY WELFARE DEPARTMENT
GOVERNMENT OF MIZORAM

Dated Aizawl, the 5th January, 2018

PHULLEN KHUA A SCRUB TYPHUS LENG EN FIAHA KALTE REPORT

Tarlan tawh angin Phullen khuaa Scrub Typhus (Rannung seh) avanga nunna chan an awm avang leh he natna vei mi engemaw zat a hmuna kal chilh a, enfiahtu Surveillance Team te chuan vawiin khan Aizawl an lo thleng leh ta.

Team Leader Dr. Pachuau Lalmalsawma, State Nodal Officer, IDSP hova han thawk chhuakte hian nizan khan Phullen Community Hall-ah Awareness Campaign neiin khawtlang mipuite nen hun tha tak an hmang ho va. He hun hi Pu B.Lalhriatpuia VCP Phullen in a kaihruai a. Dr Zoliankimi Ngente (Mimi), Medical Officer Phullen hnen atangin Scrub Typhus natna awmzia leh lan chhuahdan te leh enkawlna chungchang ngaihthlak a ni a. Dr. Pachuau Lalmalsawma, State Nodal Officer, IDSP chuan Powerpoint Presentation hmangin Scrub Typhus thlentu rannung awmzia leh an chen duhna hmunhma te, mihring taksaa pawi an khawih thin dante a sawi fiah a. Dr.Lalrotluanga, Entomologist pawhin Scrub typhus nihphung leh he natna laka inven dante powerpoint presentation hmangin a entir bawk.

Tin, Khawtlang mipuite nen sawihona hun hawn a ni a. He sawihona hunah hian mipui ten scrub typhus chungchanga an zawhna te chu Medical lama mithiam ten an chhan sak bawk. Hun tawp hi Pi Lalsawmliani, Treasurer, Village Council-in lawmthu sawina in a khar a ni. Phullen khawtlang chuan an harsatna tawh chungchanga rang taka hmalak saktu Mizoram sawrkar leh Health Department chungah lawmthu an sawi a. Health Department hotu ten scrub typhus endikna hmanrua leh dawmdawi a thlawna hman tur an rawn kensak avangin an lawm hle bakah Dr Zoliankimi Ngente (Mimi), Medical Officer fel tak, Phullen khawtlang hmangaihtu an neih avangin thlamuanthlak an tih thu an sawi bawk a ni.

Medical Team han kalte hian Scrub typhus test kit an kente hmangin vawiin khan a thlawnin damlo insawiselna nei te endik tan an ni a. Damdawi pawh a thlawna sem nghal zel a ni bawk. He thu buatsaih lai hian Phullen Medical Officer Dr. Mimi hovin mi 81 te chu thisen endik sak an ni a. Vawiin bikah hian mi 71 endik zingah mi 8 ten an lo vei a ni tih hmuhchhuah belh an ni.

He ti hian Phullen khuaa he natna hmuhchuah dan chu :

Nov 2017: Thisen test : 17-ah Positive: 14

Dec 2017: Thisen test: 51-ah Positive: 47

January 2018: Thisen test 71-ah Positive: 8

....niin heti hian insawiselna nei inentir zawng zawng mi 139 zingah a vei mi 69 hmuh chhuah an ni tawh a. Mi pakhatin he natna vang hian nunna a chan tawh a ni.

Health Department chuan thu chhuah siam nghalin Scrub Typhus hi thihpui theih natna ni mah se, hriat chhuaha enkawl hma a nih chuan enkawl dam mai theih a ni a. Mipuite chu chi-ai mai lo turin a chah a. Insawiselna nei ten a rang lama daktawr rawn vat tur leh mahni remhriatna hmanga tualchher damdawi lo in tawng chawh ve ngawt lo turin a hriattir bawk a ni.

Health Department chuan tunah hian NEDP hmangin PHC tinah Scrub Typhus Test Kit hi dah vek a nih theih nan ruahmanna an siam mek a. Hemi kawnga harsatna nei te tan hun rei lo te-ah mahni awmna hnaih ber PHC-ah a thlawnin test a tih theih tawh dawn bawk a ni.