OFFICE OF THE DIRECTOR,
HEALTH SERVICES : MINECO AIZAWL
MASS EDUCATION & MEDIA SECTION
PRESS HANDOUT

DATED AIZAWL : THE 12TH MAY 2026
PRESS HANDOUT NO: 3/5/2026

MIZO NU CHHUANAWM PI LALENTHANGI HNENAH PRESIDENT OF INDIA IN NURSE CHAWIMAWINA SANG BER FLORENCE NIGHTINGALE AWARD A HLAN.
     

Vawiin May ni 12, 2026 chawhma dar 11:00 khan Rastrapati Bhavan, New Delhi-ah India rama Nurse chawimawina sang ber National Florence Nightingale Award chu Droupadi Murmu, President of India-in Pi Lalenthangi, Health Worker, Tuichawng Ayush Health & Wellness Centre hnenah a hlan.

Vawiina he chawimawina inkhawm, Rastrapati Bhavan, New Delhi a neih hi  Droupadi Murmu, President of India-in a hmanpui a. India ram state hrang hrang atanga Nurse hnathawk tha leh chawimawi tlak mi eng emaw zah rualin he chawimawina hi hlan a ni.

Mizoram chhunga thawk nurse mi 17 in he chawimawina hi an dawng tawh a. Kumin a dawngtu Lalenthangi Hnamte, Health Worker, Tuichawng AHWC a thawk mek hi 18na a ni. vawiin May Ni 12, 2026 ‘International Nurses Day’ ah hian India ram President Droupadi Murmu hnen atangin New Delhi- ah he Award hi a dawng a ni. Award hian Certificate of Merit, Cash Award Rs. 1,00,000/- leh medal a keng tel a ni. Tin, Mizoram Sorkar chuan nurse he award dawngtu apiangte hi kum 2025 atang khan  citation leh cash award Rs. 50,000/- a hlan thin a ni.
Pi Lalenthangi Hnamte hi Auxiliary Nurse Midwife (ANM) niin, kum 1999 atang Healthworker-ah appointment hmuin Lunglei District chhunga hmun hrang hranga Health Centre-ah hna thawkin, tunah hian Tuichawng AHWC-ah a thawk mek a ni. A hnathawh chhung zawngin TB, HIV/AIDS, Cancer enkawlna, rilru hrilselna, kum upate enkawlna, leprosy (Phar) screening, nu leh nau hriselna leh COVID-19 kaihnawih programme hrang hrangte chu theih tawp chhuahin a thawk thin a ni. Pi Lalenthangi Hnamte hian emergency leh natna benvawn enkawlnaah theih tawp a chhuah thin a. Inzirtirna programme, school hriselna leh natna inkaichhawn theih loh chungchangah screening-te a buatsaih  reng a ni. Mizoram hmun kilkhawra hna  thawk niin, a bial tam zawk hi lirthei luh theih lohna a ni a. Ke-in emaw lawngin emaw damlo tlawh leh vaccine pe turin a kal thin a ni. Amah hi mi taima leh tlawmngai tak a ni bawk.

A hnathawh langsar zual bikte:

1.   Kum 2017 atangin Tuichawng AHWC ah thawkin, a thawh atang hian a bial chhungah Institutional delivery (Nau nei) rate 10% ni thin chu 87% ah hma an sawn a ni.
2.   Measles & Rubella (MR-I) vaccination hi a bial chhungah 100% an cover thei a ni.

National Florence Nightingale Award hi Ministry of Health and Family Welfare, Government of India chuan kum 1973 khan nurse leh nursing professional-te’n khawtlang tana an rawngbawlna tha tak takte hriat rengna atan a din a ni. Mizoram chhunga thawk nurse mi 17 in he chawimawina hi an dawng tawh a. Kumin a dawngtu  Pi Lalenthangi hi 18-na a ni. Mizo nurse, state pawna thawk pahnihin an dawng tawh bawk a ni.

He chawimawina hi Central, State/UT leh Voluntary Organisation hrang hranga thawk nursing personnel chhuanawm tak takte hnena hlan thin a ni. Damdawi in emaw, khawtlang emaw, zirna emaw, enkawlna hmun a  hna thawk tha bik, nunna chhanchhuah leh hun khirh tak kara hriat reng tlaka thawk nurse-te tan ram pum huapin he chawimawina hi hlan thin a ni.

He chawimawina dawng tur hian India ram state hrang hrang atangin nurse hna thawk tha bikte nominate a ni thin a, recommendation te chu Central Sorkar-ah thawn thin a ni. Central Sorkar chuan committee bik siamin dawng awma an ngaihte an lo thlang leh thin a ni.