Vawiin April ni 9, 2026 chawhma dar 10:00 khan Mizorama a vawi khatna ni turin YRC Falkland-ah Food and Drugs Administration,  H&FW te chuan Nestle India leh NASVI (National Association of Street Vendors of India) te nena tangkawpin Project Serve Safe Food Training an buatsaih a, Aizawl leh a chhehvela kawng kama ei leh in zuartu Street Food Vendor mi 100 thlan chhuahte hnenah training pek a ni.

He training hi Pi K. Lalrinzuali IAS,  Commissioner of Food Safety chuan a hmanpui a. Training hawnna inkhawmah hian Mr.Sanjay Simon Sen, Corporate Affairs Manager, Nestle India Ltd. leh Mrs. Sangeeta Singh, NASVI Head ten Welcome Address an sawi a. Mr. Surojit Mukherjee, Nestle India hnen atangin thusawi bengvarthlak tak ngaihthlak a ni bawk.

He hun hmanpuitu Pi.K.Lalrinzuali IAS chuan Street Food Vendors te pawimawhna leh zin mite leh hnam dang laka ram hmel pholangtu an nih dan te a sawi a. Vawi khat ei siam dan dik lovin nghawng a neih thui dan leh fimkhur a ngaih dante tarlangin, training chhim tura thlan chhuah an ni chu lawmawm atih thu a sawi a, an thil zir chhuahte a taka hmang tangkai chhunzawm nghal turin a fuih bawk. Thusawitu dang, Pu F.Lalliantluanga, Joint Directore F&DA chuan kal khawmte chu fuihin, "Tui taka ei leh in siam thiam nih mai hi a tawk lo va, a eitu mipuite hriselna atana him leh tha, entawn tlaka siam thiam nih hi a pawimawh lai tak chu a ni. Hemi kawnga nasa zawka tan lak hi kan tih makmawh a ni." tiin training chhimtute chu hlawkna chhar haw ngei tura a duhsak thu a sawi bawk. He hawnna inkhawmah hian Health Department a hotute mi thahnem takin an tel pui bawk a ni.

Nestle India leh NASVI (National Association of Street Vendors of India) te chuan kum 2016 khan Street food Vendors te mumal zawka training pe turin thawhhona an duang a. He training paltlang te chu FSSAI atangin FoSTaC (Food Safety Training and Certification) Certificate pek an ni bawk. State tina Food Safety Department te nena tang hovin hetiang training hi an buatsaih thin a ni. He Project, Serve Safe Food Training hi state 30-ah buatsaih tawh niin Street Food Vendors (Kawng kama ei leh in zuar) mi 92862 train chhuah tawh an ni.

Trainer-te hi NASVI mi leh sa te niin, training a kalte hi an dawra an inthuamna tur leh hmanrua Hygiene Kit bakah Training Certificate te hlan vek an ni bawk.