OFFICE OF THE PRINCIPAL DIRECTORAT
HEALTH & FAMILY WELFARE DEPARTMENT
(MASS EDUCATION AND MEDIA SECTION)


(PRESS HANDOUT)

DATED AIZAWL 
THE 6th July, 2018
SCRUB TYPHUS LENG CHUNGCHANGA HEALTH DEPRTMENT THUCHHUAH


Thenzawl khaw chhehvela Scrub Typhus leng chungchangah vawiin July ni 6, 2018 (Inrinni) khan Health Department chuan thuchhuah an siam.

Kumin 2018 January ni khat atanga vawiin July ni 6, kum chanve chhung hian Thenzawl CHC huam chhungah Rannung Seh natna vei mi 64 hmuhchhuah tawh an ni a, an zinga mi 54 hi June thla leh vawiin July ni 6 inkar chhunga hmuhchhuah an ni a. May thla khan mi pakhatin a lo thihpui tawh a, hetiang a nih avang hian May ni 23 & 24 khan Scrub Typhus leng chungchang enfiah turin Health Department hian Integrated Surveillance Team pawh a lo tir chhuak tawh nghe nghe a. Anni hian investigation hrang hrangte uluk leh chipchiar takin an nei tawh a. Thenzawl mipuite hnenah pawh awareness campaign thlengin an lo va neih tawh bakah report pawh Central IDSP-ah theh luh a ni.

Tun hnaiah hian Thenzawl CHC huam chhungah scrub typhus hian hluar lam a pan chho nia alan avangin vawiin hian Health & Family Welfare chuan hemil chungchangah hian vawiin khan thu chhuah an siam.

SCRUB TYPHUS CHUNGCHANGA SAWRKAR HMALAKNA LEH MIPUITE HRIATTUR :

Scrub Typhus hian Mizoram hmun hrang hrangah bu a khuar nghet tawh hle tih hriat a ni a. Tun dinhmunah hian Mizoramah 2012 atanga july 2018 thleng hian mi 1710 vei hmuhchhuah ni tawhin heng kum 6 chhung hian vanduaithlak takin mi 41 in an lo thihpui tawh a. Kumin January atanga vawiin July ni 6 thleng hian Mizoram pumpuiah Scub Typhus vei mi 721 an awm tawhin mi 5 in nunna an lo chan tawh bawk.

Scrub Typhus hrik hian sazu-ah bu an khuar a. Scrub Typhus hrik pai sazute atang hian tuhrikin la chhawng ve lehin mihringin kan lo kai ta thin a. India ramah hian furah intanin favang leh thlasik-ah te a hluar zual  a. India hmarchhakah hian he natna hi a tam zual bik bawk a ni. 

Mizoram Sawrkar hian Scrub-typhus natna bik atan hian Central lam atangin fund hmuh a harsat deuh avangin Health & Family Welfare Department chuan he harsatna sukiang tur hian ruahmanna mumal tak siamin hma a la mek a. NEDP atangin hmalakna chi hrang hrang atan sum tam tham tak hman theih turin remtih sak an ni tawh a. Heng sumte hi scrub typhus chungchang mipuite hnena hrilhhriat nan te, a test-na hmanraw tha zawk leh changtlung zawk, Weil Felix Test leina tur leh chiang leh zuala he natna awmzia zirchianna (Research) neih nan te hman a ni ang. Tin, Scrub Typhus test-na  hmanruate pawh sawrkar damdawiin zawng zawngah a thlawna hman turin dah tum a ni bawk.

Thenzawla scrub typhus leng chungchangah hian a tul anga hma lak mek zel niin district CMO leh a thawhpuite hmalakna thu ngaihchan mek zel a ni. 

Health Department thuchhuah chuan Scrub Typhus hi tute pawhina kan vei theih leh mizorama natna hluar tak pakhat a lo nih tak avangin mitin te mahni in leh a velte fai taka vawng a, sazu leh tuhrikte tana chettlatna remchang siam sak lo tur te, a hluarna hmun bikah phei chuan daivah leh ram kal ilovah thawmhnaw phui tha tak hak a, rannung duh loh odomos ointment te inchulh a, hnathawh zawh apianga sahbawn nen fai taka inbual thin te, khua a sik chuan rang taka doctor te pan vat turin a hriat tir a. Kumin hian zoram hmun tam takah Rawnal (Dendrocalamus Longispathus) a tam (Flowering) nasa a. Hei vang hian sazute hi an inthlahpun chak phah hle a. Chuvangin scrub typhus pawh hi a hluar lehzual nia hriat a ni.  Scrub Typhus hi enkawl hma chuan natna tih dam awl tak, ngaihthah erawh chuan thihpui mai theih natna anih avangin mitin te hemi kawngah hian uluk lehzuala fimkhur turin a chah a ni.

He natna chungchanga hriat chian duh nei chuan heng a hnuaia no. ah te hian englai pawhin zawhfiah theih a ni a.

Dr.Pachuau Lalmalsawma (Epidemiologist) SNO, IDSP                                  :   9436195535
Pu Lalfakzuala Pautu, State Entomologist, IDSP                                             :   9612326762
Pu Lalchhanchhuaha (Amtea Hauhnar) Projectionist, DHS/MEM                    :   8974304288