OFFICE OF THE DIRECTOR

HEALTH SERVICES : MINECO AIZAWL

 

MASS EDUCATION MEDIA SECTION

 

PRESS HANDOUT

No. 11/43/2023

 

STATE TB FORUM REVIEW MEETING NEI

 

(Kumin January atanga June thla thlenga TB vanga thi zat hi mi 62 an ni tawh)

 

  

Vawiin 15th November 2023 chawhnu dar 1:00 khan State TB Cell chuan Secretariat Conference Hall, MINECO-ah kumin chhunga an hmalakna hrang hrangte thlirhona Review Meeting an hmang.

 

Vawiina State TB Forum Meeting hi Pi Esther Lalruatkimi IRS, Principal Secretary H&FW in a kaihruai a. Secretary hian lawmna thu a sawi zawh hnu-ah Agenda sawi hawng turin Dr.Eric Zomawia, Mission Director NHM a sawm a. Hemi hnu hian Dr.Febiola Kharkongor, State TB Officer chuan Powerpoint Presentation hmangin Agenda sawizauna leh hmalakna tarlanna hun a hmang bawk.

 

            He hunah hian TB tihremna kawnga hmalakna thlir let niin hmachhawp hrang hrang tihhlawhtlin a nih theih nan ruahmanna siam a ni a. Education Department, Social Welfare Deptt. bakah NGO hrang hrangte nen TB dona kawngah a tul anga thawkho turin ruahmanna siam a ni bawk. Tin, Chief Informatic Office lam ten TB chungchang data pawimawhte an website-a an update zel theih dan tur rawtnate siam a nih bakah damlote tan Falkawna District TB Centre chu a panna a hlat avangin  mipuite tana awlsam zawkna a nih theih nan Aizawla dah dan tur chungchang pawh sawi lan a ni a, he thil hi hmalak mek a nih thu tarlan a ni.

 

            He huna thusawitu Pi Esther Lalruatkimi IRS, Principal Secretary chuan TB tihrem kawngah theih tawpin hmalak ni mah se, chhan hrang hrang avangin TB vei hi kan tlahniam chak tawk lo hle a. Case pawhin pun lam a pan nia a lan avangin nasa zawka mipuiah zirtirna kan inpek nasat a pawimawh a ni. TB vei mekte dinhmun chu thuhran lo ni ta se, a la kai ve lo mipui ten a nawlpui ang pawha inven dan tur kan hriat chian leh zual a tul a ni tiin huam zau zawka awareness inpek a pawimawh thu a sawi.

 

State TB Cell report-in a tarlan danin:

 

·         Tun dinhmunah kumin 2023 January atanga October thla thlenga TB rinhlelh test zawng zawng hi mi 12,309 a ni a. Hei hi mi nuaikhat zelah mi 933 test ang a ni.

·         Kumin January atanga October thla thlenga TB vei hmuh chhuah hi mi 1929 a ni a. Heng zingah hian MDR TB vei 122 hmuh chhuah an ni. MDR-TB vei tihdam zat hi 70% a ni.

·         Tar lan theih chinah kumin January atanga June thla thlenga TB vanga thi zat hi mi 62 an ni tawh a. TB tihdam zat chu 83% a ni. Tin, TB leh HIV vei kawp hi 12% a ni.

·         Pradhan Mantri TB Mukt Bharat Abhiyaan hnuaia TB damlote chhawmdawlna  kawngah Doners 274 awm tawhin chaw tha pack (Food basket) 2373 sem chhuah tawh a ni.

 

Nimin a State TB Forum meeting-ah hian Health Department Official te bakah, MSACS, Education dept, Social Welfare dept, MHIP, HIV Network leh TB vei dam tawh te an tel a ni.