TB enkawlna chungchang Thlirletna

Review Meeting neih a ni.

Vawiin 29th Sept, 2016 Chawhma dar 10:00 khan I & PR Conference Hall-ah TB enkawlna chungchanga thlirletna 2nd Quarter Review Meeting 2016 chu Dr. Rohmingthanga Ralte, Director of Health Services hova neih a ni.

Meeting hi Dr. Vanlalfela, State TB Officer in a kaihruai a, harsatna tam tak kara district hrang hrang atanga he meeting ngai pawimawha mi sawmte an lokal thei chu lawmawm a tih thu a sawi a. Health Department hnuaiah program hrang hrangte hi mitin tana pawimawh tak tak vek an nih avangin eng program mah ngaihthah theih ani lo a, rual khai taka kal zel tura a duh thu a sawi a ni. Tin, TB damlo na zualbik enkawlna DR-TB Centre chu Mizoram-ah Falkawn-a kan neih bakah Lunglei District-ah DR-TB centre thar a awm theihna tura ruahmanna siam mek a nih thu asawi bawk a ni.

He review meetingah hian April– June 2016 chhunga TB vei hmuhchhuah chungchang chhui bingna neih ani a.

kumin April – June 2016 chhunga Mizorama TB enkawlna chungchang hetiang hian tarlan a ni:-

  1. TB vei nia rinhlelh exam zawng zawng - 2214
  2. TB vei hmuhchhuah zat - 609
  3. TB vanga boral - 12

4.TB HIV vei kawp enkawl zat - 64

5.MDR-TB vei enkawl - 12

6.TB vei enkawl dam - 93%

Chief Guest Dr. Rohmingthanga Ralte, Director of Health Services chuan thusawiin he hun hmang tura lokal zawng zawngte chungah lawmthu a sawi a, hriselna chungchangah inzirtirna pek uar a pawimawh thu sawiin TB natna leh natna dang lakah kan him theih nan kan nun dan phung te, faina chungchangah te hma kan sawn zel theih nan inzirtirna pek uar a tul thu sawiin Health program a thawk zawng zawng Health worker te, ASHA te thleng pawha in zirtirna pechhawng thei tura natna leh invenna chungchaga inhrilh hriatna kan uar lehzual angai tih a sawi.

Dr. Zosangliani, Asst. Program Officer chuan powerpoint presentation hmangin TB enkawlna atana kalphung thar , Techical and Operational Guidelines on RNTCP chungchagah presentation pe in hemi hnuah hian Dr. Vanzarliana Medical Officer STCS, leh Dr. Albert Lalhminghlua, Medical Officer, DR- TB Centre ten Power point presentation hmangin district tina kumin April-June chhunga Case hmuhchhuah leh enkawl chungchanga report leh MDR-TB vei enkawlna chungchangah te presentation an pe bawk a ni.

He meeting-ah hian Dr. K. Lalbiakzuala, Mission Director, NHM, Dr. Gautam Borgohain WHO Consultant leh district hrang hrang atangin District TB Officers te an lo tel a, meeting hi tlai dar 3 thleng neih ni in chumi hnu ah Mizoram State Aids Control Society (MSACS) ho in State Technical Working Group Meeting neih chhunzawm a ni.