Vawiin 14^th March 2020 hian Health Directorate Conference Hall-ah Training of District Trainers on COVID-19 neih niin he hun hi Dr. Eric Zomawia, Mission Director, NHM in a kaihruai a. He training-ah hian Mizoram district hrang hrang atangin hriselna lama hmalatute kohkhawma zirtirna pek an ni.

Traning hawnna hun neih a ni a, Dr.Eric Zomawia, Mission Director, NHM in kaihruaiin Keynote address a pe a, Dr.F.Lallianhlira, Principal Director, HFW chuan training hawnnaah thu sawiin, “Mizoramah Covid-19 case hmuh la ni lo mah se, khawvel ram hrang hrangah nasa taka a darh tawh avangin keini ram pawh kan fimkhur a tul ta hle a. Chuvangin keini pawh inveng thei dinhmuna kan din lai hian inven kawngah theihtawpa tan kan lak a ngai a ni,” a ti. Dr.F.Lallianhlira PD chuan Mizoram sawrkar hnuaia Health department hmalakna langsar zual a tarlang a. Lengpui Airport-ah uluk leh fimkhur taka nitin screening neih a nih thu te, sample lakna tur hmunhma pawh Aviation lam thuneitute nena thawkhovin Lengpui Airport-ah room awl siam a nih tawh thu te a sawi. Tin, khualzin rinhlelhawm, home quarantine ti thei lo tura ngaihte tana quarantine-na hmun siam a nih thu te bakah Mizoram border hrang hrangah checking uluk taka neih chhunzawm zel a ni a, kan tih fuh tawkloh leh thawm that kan ngaihna laiah pawh hmalak nghal zel niin theih tawp kan chhuah a ni a ti. Thawktu duhthusam a indaihlohna karah mumal leh tha zawka he hri laka mipuite kan lo him theih nan a theih ang anga thawktute pawh siam rem an nih thu a sawi.

He hunah hian district hrang hrang atangin Medical Superintendent leh Chief Medical Officer ten an bial chhung theuhva an hmalak dan leh rawtna an thlente ngaihthlak leh sawihona hun hman a ni a. Chawhnu lamah training hi tun thla ni 6 a WHO-in New Delhi-a Training of Trainers a buatsaih a zuk tel te leh Rapid response team member ten training an pe a, heng an hriat thar te hi training a kalte hian an mahni awmna District theuh ah zirtirna an pe leh chhawng dawn a ni.

He hunah hian Covid -19 atana sawrkar Spokesperson Dr.Pachuau Lalmalsawma chuan Zirtirna pek pahin Lengpui Airport leh Screening tihna hmun hrang hrang a hmaih palh awmlo tura hmalak anih laiin mahni awmna hmun theuh ah Covid-19 lenna hmun atanga lo haw hmaihpalh an lo awm anih chuan Call center No. 102 leh 0389-2323336, 2318336 ah te eng hun ah pawh hriattir zel turin ngenna a siam. Covid-19 spokesperson chuan Covid -19 laka him turin fimkhurna leh chet thianghlimna te hi mitin tan hmanraw pawimawh ber a nih avangin fai taka Kutsil fo te, midangte an him zawk nan ual au taka khuh leh hahchhiau loh te bakah tulna bik tak neite kan nih ngawt loh chuan zinchhuah loh hram hram rih a that thu te sawiin mipuite pawh punkhawmna lama kal tam lo turin a chah bawk a ni. Dr.Pachuau Lalmalsawma chuan ngenna siam nghalin Sawrkar leh Private damdawiin zawng zawng a damlo te kan in kan/tlawh thin danah pawh fimkhur a tul thu sawiin chhungte hnaivai tak tak leh damlo tana tangkaina tak neisi lo te chu Sawrkar leh Private damdawiin a damlote kan/tlawh thu ah insum turin a ngen a, he ngenna hi mipuite kan him tlan zawkna tur atana siam a nih angin zawm ngei turin mipuite a chah a ni.

General Advisory: " Covid-19 laka inven nan leh fimkhur thu hlaah mi tupawh khawsik, hritlang, khuh leh thawkna lama harsatna nei te chu school, college, bazar, biakin leh puipunna hmuna kal lova mahni in emaw damdawiin lamah emaw inenkawl tura ngen leh hriattir kan ni e"