Vawiin khan DHME Conference Hall, MINECO ah Mizoram Health Care Society buatsaihin Performance review meeting on MUHCS Implementation neih a ni a. He hun hi Health Minister - Pi Lalrinpuii chuan khuallian niin a hman pui a, Mizoram hmun hrang hranga Community Health Centre leh Primary Health Centre a thawktuten MUHCS an kalpui dan chungchanga an hmalakna leh harsatna tawh hrang hrangte an sawi ho a ni.
Health Minister chuan Mipui hmangaih vanga Mipui Health Care hi duan a nih thu a sawi a. Awlsam zawng ngaihtuah ni ila reimbursement kan kalpui thei reng a. Mahse, mipui hmakhua kan ngaih avangin Cashless kalpui a ni a ti. Pi Lalrinpuii chuan, mipui sawrkar, mipui ta, mipui tana ding kan Sawrkar in mipui tana Health Care system hi a duan a nih tlat avangin a hlawhtlin chhoh zel a beisei thu a sawi.
Sawrkar chuan theihtawpin Sawrkar damdawiin-te a thuam that zel thu sawiin, Pi Lalrinpuii chuan, Nurse 300 lak belh an ni a, multi task worker 100 lak thar an ni in, thawktu hrang hrang X Ray technician, lab technician leh Public Relations Officer(PRO) te thlengin lak belh an ni a. Health Worker 100 lakbelh a ni dawn mek bawk a, infrastructure lamah pawh Nabard hnuaiah PHC leh sub centre engemaw zat sak that a ni dawn a, JICA hnuaia cancer superspeciality hospital kan neih tur chu kalpui mek a ni a, ZMC hnuaia ICU 13 siam belh tur te, Cardio thorasic leh neuro surgery unit din thar tur te, Aizawl Civil Hospital a Kidney transplant lam din tura hmalak mek anih thu te, IVF centre level 1 license pek a nih dante a tarlang bawk a, Sawrkarin theihtawp a chhuah avangin PHC/CHC te chu mipui hmangaihna nen, tun aia nasa lehzuala tan la turin a fuih bawk a ni.
He hun hi Dr Lalthlengliani, Principal Director in kaihruaiin, CHC leh PHC hrang hrangte performance detail review chu Dr. Biakthansangi, CEO, MIzoram Health Care Society in a nei a, MUHCS online registration module thlir ho niin, live demonstration Pu Lalzirtira, Informatics officer-in a nei bawk.
