National Programme for Prevention and Control of Deafness (NPPCD) buatsaihin nimin ni 25.9.2017 khan Assembly Annexe conference hall-ah ‘World Day of the Deaf’ hman a ni a, Health minister _ khuallian a ni. He hunah hian, financial year 2017-18 chhung, August 2017 thlengin beng ṭha lo mi 7,013 hmuh chhuah a nih thu an tarlang.
Health Minister chuan, beng ṭha lo leh bengngawngte biak nawmnaha nuiza siam nan hman an ni fo ṭhin tih sawiin, "Hei vang hian anmahni an inkiltawih a, mahni inhmuh hniamna an nei phah a. Tunah pawh hearing aid (ri hriatna ṭanpuitu) vuahte kan en dan a la dang deuh zel a ni," a ti a; bengngawng en danah rilru puthmang thlak a ṭul thu a sawi.
Lal _ chuan, bengngawngte endawng loh te, chhiah nawmnah loh leh nuihzat loh an ṭul thu leh an chhungte pawhin zaizira inbiakna (sign language) an thiam ve a ngaih thu sawiin, "Zaizira an inbiakna hi thil mak ena en loin, kan pawm thiam a ṭha. Hearing aid vuah ngaite'n an vuah ngam theih nan kan en dan danglam lo se. Chhungkua, khawtlang leh tlawmngai pawlte hi bengngawngte enkawlnaah ṭan i la thar ang u," a ti.
Health Minister chuan, naute chu kum 2 an tlina aw an la chhuah mumal theih lo emaw, an la ṭawng chhuah mumal theih loh chuan mithiamte entir thuai a ṭhat thu a sawi a; bengngawngte enkawlna kawnga thawkte chu inpekna thûk zawk nena thawk zel turin a ngen bawk.
World Day of the Deaf hi September thla Pathianni hnuhnung berah hman ṭhin a ni a, Mizoramah chuan nimin khan hman niin, thupui chu ‘Full inclusion with sign language’ tih a ni.
NPPCD state nodal officer Dr Eric Zomawia'n Mizorama NPPCD hmalaknate a sawi a, SCERT deputy director Vanlaldiki Sailo-in zaizira inbiakna (sign language) chungchang a sawi. Gilead Special School leh Deaf School of Mizoram zirlaite'n hun an hmang bawk.
NPPCD hi India ramah August 2006 aṭangin kalpui a ni a, Mizoramah chuan August 2014-ah kalpui ṭan a ni.
