GOVERNMENT OF MIZORAM
HEALTH & FAMILY WELFARE DEPARTMENT
(PRESS HANDOUT)
Kum tina neih thin, khawvel mipuite hriselna kawnga inzirtirna ni bik World Health Day chu April ni 7, 2017 (zirtawpni) khan Health & Family Welfare Department chuan Principal Director, Dr. F.Lallianhlira Office Chamber-ah an hmang.Mass Education & Media Section bultum World Health Day Programme hi Dr.F.Lallianhlira, Principal Director H&FW in a kaihruai a. Chairman-in kalkhawmte lawmna thu a sawi zawh hnu-ah Dr.Lalchungnunga, Director of Health Services-in World Health Day Thupui "Depression, Lets Talk" tih a sawi hawng a. Director chuan "India ramah hian mihring za zela 4.5 te chu depression avanga harsatna tawk an nih thu te, khawvel pumah mihring maktaduai 350 laiin depression an vei thu te,kum 15 atanga 20 inkarah a tam lehzual thu te a sawi a. Hemi enkawl nan hian National Health Mission hnuaiah pawh Mental Health din a nih dan te a sawi bawk.
Hemi hnu hian World Health Day Theme puala thusawi tura sawm Dr. Robert L.Khawlhring, State Nodal Officer chuan hun a hmang ve leh a, Dr. Robert chuan Depression chu tunlaiah mitin deuh thawin kan hmelhriat tak dan te a sawi a. Khawvelah hian second 40 dan zelah depression avang hian mi pakhat zelin nunna an chan ziah ni a chhut a ni a ti. Depression lan chhuah dan kawng hrang hrangte tarlangin nguai leh lungngai reng mai te, Phurna hloh, Ei leh in lama mi baka ei/in tlem leh tam, mu tam leh mut theih lohna nei chi te, thinurna leh thinchhiatna bakah a dang kawng tam taka a lan chhuah thin dante sawifiahin hetianga mihring mizia a lo danglam chuan an chenpuite ngei pawhin ngun taka an thlithlai vat a ngai a ni a ti. Dr. Robert chuan mi thenkhatin depression avanga Psychiatrist rawn hi an hreh fo thin a. Hei hi thil tha lo tak a ni tiin hemi kawnga thiamna neite a rang thei ang bera pan mai hi a him ber a ni a ti a ni.
Hemi hnu hian Dr. T.Lalhmangaihi, Director, HME in thutawi sawiin hun a hmang a. Chumi hnu-ah Pu C.Lalmuankima, State Mass Education & Media Officer in lawmthu sawiin hun hnung a khar a ni.
