World Heart DayCOMMISSIONER SECRETARY PU _ FANAI, IAS HOVIN MIZORAMA A VAWIKHATNA'N WORLD HEART DAY HMAN A NI

Mizorama kan la hman ngai loh, Khawvel puma Lung (Heart) hriselna kawnga ni bik, 'WORLD HEART DAY' chu vawiin September ni 29 (Ningani) chhun dar 12:00 khan Pu _ Fanai, IAS, Commissioner Secretary H&FW hovin Tourist Lodge, Chaltlang-ah hlawhtling taka hman a ni,

National Programme for Prevention & Control of Cancer, Diabetes, Cardiovascular Diseases & Stroke (NPCDCS) bultum he World Heart Day vawikhatna hunan hian Chairman Dr. K.Ropari, Principal Director, H&FW in kalkhawmte lawmna thu sawiin Mizoramah a vawikhatna atana World Heart Day hman a nih theih nana hma latu NPCDCS chungah lawmthu a sawi a. Hemi hnu hian Dr. Loncy V.Lalzarliana, Cardiologist, Civil Hosp. Aizawl hnen atangin Cardiovascular natna (Lung natna) leh a awm tirtu bakah a invenna te Powerpoint Presentation hmanga chipchiar taka ngaihthlak a ni. Tin, Dr. Eric Zomawia, SNO, (NCD) NPCDCS chuan NCD natna leh Nundan Hrisel zawk neih theihna tur zirtirna a pe bawk.

Tin, Dr. K.Lalbiakzuala, Director, HME & Mission Director NHM pawhin Thalaite fuihna thu leh thangthar tana kalphung hrisel zawk neih theih dan tur a sawi bawk a ni.

He huna thusawitu Khuallian, Pu _ Fanai, IAS chuan Sawrkarin laipui ngei pawhin NCD chu a vei tak zet thu te, hemi mai bakah Blindness, Deafness leh Mental Health atan te pawh huang a zauh zel thu a sawi a. North Eastern Council atang pawha tanpuina dawn a nih thu leh Civil Hospital-ah pawh cardiovascular Department kan neih ve tak dan te, Super-special pawhin a thut chilh tak thu te a sawi a. NPCDCS kaihhnawih atan district tinah theih anga chaka hmalak meka nih dan a sawi bawk. Pu _ chuan "Heng sawrkar hmalakna te hi amah ngau ngauva puitling thei a ni lo va, mipui te hian a hlawhtlinna-ah nasa takin mawh kan phur a ni. Sawrkar hmalakna ringawt a tawk lo va, NGO te, mimal leh ram mipuite hi hriselna tha zawk nei turin kan tanrual a ngai tak zet a ni a ti.

NPCDCS report-in a tarlan danin World Health day hi World Heart Federation hmalaknain kum 2000 atang khan kum tin Sep ni 29-ah a lo ni tawh thin a.He ni-ah hian Lung natna leh Stroke te hi mihring nunna latu tam ber a ni tawh tih hi mipuite hrilhhriatna atan hman a ni thin. A thlentu langsar (risk factor) hrang hrang, vaihlo hmanna, awm awl luat tuk, ei leh in hrisello tih leh zu in nasat that loh zia te nasa taka puanzar te hi NPCDCS in a thupui ber pakhat a ni bawk. Cancer. HIV/AIDS leh malaria avanga thihna belhkhawm aiin lung natna hian thihna a thlen tam zawk a.Kum tin mi maktaduai 17.3 laiin nunna an chan phah thin a ni.

NPCDCS kan tih hi Mizoramah kum 2014 khan Health Minister-in a launch a, tunah hian:

State NCD Cell pakhat,

District NCD Cell paruk,

District NDC Clinic paruk

CHC/SDH NCD Clinic 10 neih a ni bawk a. Heng hmunah te hian Blood Sugar leh BP check theih vek a ni bawk. Kum 2015-2016 inkar chhung khan mi 85710 screen zingah 9666 (11.2%) in zunthluman vei tih hmuh chhuah a ni a. 12904 (15%) in BP Sang an nei tih hmuh chhuah a ni bawk. Tin, mi 673 in Lung natna leh a kaihhnawih an nei a ni tih hriatchhuah a ni bawk a ni. Kum 2015-2016 chhung hian NPCDCS te hian Mizoram chhung veng/khaw hrang hranga tum 63 lai awareness campaign an nei hman bawk.

World Heart Day ah hi Hrangbana College atangin Education Deptt. 5th Semester zirlai te leh Govt. Chaltlang High School ten sawm an nih angin hun an hmanpui a. Programme karlakah zaithiam ten hun an hmang a. Dr. Rohmingthanga Ralte, Director of Health Services chuan lawmthu sawina in hun hnung a khar a ni.