OFFICE OF THE DIRECTOR,

HEALTH SERVICES : MINECO AIZAWL

MASS EDUCATION & MEDIA SECTION

PRESS HANDOUT

DATED AIZAWL : THE 11TH OCTOBER 2024

PRESS HANDOUT NO: 17/10/2024

DATED AIZAWL THE 11^TH OCTOBER 2024

WORLD HOSPICE & PALLIATIVE CARE DAY 2024 HMAN A NI

( F.Year 2024-2025 chhungin Palliative damlo entawh zat hi 2224 an ni a, damlo 1155 te chu admit niin damlo thar 366 an awm. )

Vawiin 11th October, 2024 (Zirtawpni) chawhma dar 11:00 khan dinhmun hlauhawma ding mek damlote leh an chhungte’n nun nuam leh hahdam zawka hun an hman theih nana inenkawlna leh hemi kawnga inzirtirna ni World Hospice & Palliative Care Day chu Directorate of Hospital & Medical Education Conference Hall, MINECO-ah hman a ni a. Dr.Lalthlengliani, Director, DHME chuan Khuallian niin hun a hmanpui.

Vawiina World Hospice & Palliative Care Day pual inkhawm hi Dr.SR Ngurchamliana, Addl. Director DHME-in a kaihruai a. Kalkhawmte lawmna leh sawi zauna hun a hman hnuin Dr.Lalfakzuala, Radiation Oncologist, DNO, NPPC Aizawl east District chuan chuan kumin thupui, "Ten Years Since The Resolution : How Are You Doing?" tih hmangin presentation a pe a. Palliative Care Mizorama kalpui a nih dan leh hmalakna hrang hrangte a tarlang. 

          Dr.Lalfakzuala chuan cancer leh natna benvawn khirh zual, HIV/AIDS, kal tha lo, thin tha lo bakah natna dang tam tak veitu,  dam beiseiawm tawh lo ten na hrehawm tak an tawh lohna tura Palliative Care Programme hi din leh kalpui a nih thu a sawi a. Ram changkangah pawh palliative care hmanga inenkawlna hi kalpui a nih vek tawh thu a tarlang. Dr.Lalfakzuala chuan, “A bikin cancer vei za zela 80 te hi dam chhuak lo tura ngaih an ni a. Za zela 70 te hi na hrehawm tuarte niin za zela 90 te hi nachhawkna nena enkawlna dawng te an ni. Chutih laiin za a 30 te hi na tak tuarin mual an liam ni a chhut a ni bawk. Hetiang a nih avang tak hian hospice & palliative care hi a pawimawhna a sang hle a ni,” a ti. Tin, khawvel  leh India ramin  Palliative Care a kalpui dan bakah a pawimawhna leh a awmzia tarlangin mipuiten hemi kawnga zirtirna kan mamawh dante kalkhawmte hnenah a sawi fiah bawk.

He huna thusawitu Khuallian Dr.Lalthlengliani, Director Hospital & Medical Education chuan, "National Programme for Palliative Care (NPPC) hi National Health Mission (NHM) hnuaiah kum 2016 atanga Mizorama tan, Programme la upa lo tak ni mah se, District 9 heng – Aizawl East (MSCI), Aizawl West (State Referral Hospital, Falkawn), Champhai, Kolasib, Lawngtlai, Lunglei, Mamit, Serchhip leh Siaha District ah te kalpui mek a ni hi lawmawm ka ti a, NPPC hnuaiah hian thawktu mi 12 chauh la awm rih mah se anni hian rintlak takin hna an thawk a, hei hi chhuanawm ka tiin India rama small state zinga a ti tha berte zinga kan han lang theite hi hlawhtlinna ropui tak a ni” a ti a. “Palliative care hmanga enkawlna dawngtute hian ngaihsakna an mamawhin hmangaih an ngai a, an harsatna ngaihthlaksak a, anmahni hnemtu nih hi kan mawhphurhna a ni. Tin, tawngka mai bakah tak chetzia a lan tir bakah inchul-nel (physical contact) te hi anmahni enkawl nan a pawimawh thin. Tin, thawktute pawhin eizawnna ang chauhva ngai lo va ngilneihna in lantir tawn tur kan nihna hre renga Palliative damlote enkawl hi kan bat a ni." a ti.

Palliative Care in a tum ber chu Cancer mai ni lo, natna benvawn hrang hrang avanga damlo, dinhmun hniam leh thih hlauhawma ding mek ten rilru hahdam leh zangkhai zawka hun an hman theih nan te, an na tawrh damdawi hmanga chhawk zangkhai sak a nih theih nan bakah anmahni enkawltu an chhungte thlenga nun nuam leh hahdam zawka an awm theih nana hmalakpui hi a ni.

Palliative Care hi Mizoram-ah National Programme for Palliative Care (NPPC) hmalakna in kum 2016, October atang khan kalpui a ni a. Serchhip leh District thar pathum tih loh Mizoram district dang zawng zawngah kalpui a ni tawh a.  Thawktu ten Palliative Care Unit-a awmte chauh ni lovin Home Visit neiin damlo te an chenna inah tlawh chhuakin a tul angin damdawi leh hmanrua te nen an buaipui thin a ni. He programme hmang tangkai tur erawh chuan registration tih a ngai ve thung a ni.

          NPPC report in a tarlan danin Financial Year 2024-2025 chhung hian Palliative damlo hi mi 2224 en a ni a, damlo 1155 admit an ni. Palliative damlo thar hi 366 an awm a. Home visit tum 301 neih tawh niin Palliative enkawlna dawng chunga in lama boral mi 88 awmin damdawiinah mi 61 an boral bawk. Tunah hian Palliative care mamawhte tan Mizoram State Cancer Institute ah khum 10, Civil Hospital Lunglei ah khum 8 reserve sa reng a ni bawk.

          Vawiina Hospice & Palliative Care Day puala inkhawmah hian Mizoram College of Nursing leh BN College of Nursing ten hun karlakah Skid leh Item hmuhnawm tak tak an entir a. Dr.Catherine Lalmuanawmi SNO, NPPC in lawmthu sawiin hun hnung a khar a ni.

Attached: 1) News Clip Video

                2) Chief Guest Speech Editable (MS Word File)