OFFICE OF THE PRINCIPAL DIRECTOR 
HEALTH & FAMILY WELFARE DEPARTMENT
............................
MASS EDUCATION AND MEDIA SECTION
(PRESS HANDOUT)

DATED AIZAWL 
The 14th  October, 2019

WORLD HOSPICE & PALLIATIVE CARE DAY HMAN A NI

Cancer natna leh natna benvawn leh khirhkhan zual, dam beiseiawm tawh lo ten an hun hnuhnung lama na hrehawm tak an tawrh lohna tura enkawlna programme pakhat Programme for Palliative Care (NPPC) chuan vawiin October ni 14 chawhnu dar khat khan Taxation Auditorium, New Capital Complex-ah World Hospice & Palliative Care Day an hmang a, he hun hi Dr.ZR Thiamsanga, MLA Vice Chairman, Health & Family Welfare Board chuan Chief Guest niin a hmanpui.

He World Hospice & Palliative Care Day pual inkhawm hi Dr. Eric Zomawia, Mission Director, NHM in kaihruaiin kalkhawmte lawmna thu a sawi a. hemi hnu hian Dr.  Jeremy L Pautu, State Nodal Officer, NPPC, NHM in Overview of NPPC powerpoint presentation hmangin a entir a. Khuallian Dr.ZR Thiamsanga, MLA & Vice Chairman, H&FW Board-in NPPC TV spot release in thusawina hun a hmang bawk.

He huna thusawitu Khuallian Dr. ZR Thiamsanga, MLA chuan "Palliative Care pawimawhna hian hriat a la hlawh lutuk loh avangin sawrkar pawhin hemi kawngah hian nasa lehzuala tan lak a tum a. Kum thar atang chuan state pumah pawh changtlung zawka kan kalpui theih i beisei ang u" tiin "Hemi kawnga thathawh ngaihna apiangah Mizoram sawrkar chu a inhawng reng a ni," a ti.

Dr. Jeremy L Pautu report-in a tarlan danin khawvel pumah hian mihring maktaduai 20 te hian palliative care pek ngai an ni a. Chung mite chu third world countries kan tih, developing countries hovah hian an tam lehzual a ni. Mizoramah hian a bikin cancer damlo, thi mai tawh tur ten na taka an tawrh lohna tura enkawlna programme NPPC kan tih hi kum 2016 atang khan hman tan a ni a. tunah hian district paruk Aizawl East & West, Champhai, Kolasib, Mamit leh Lunglei district-ah te hman a ni tawh a ni. Mizoramah hi chuan he programme-hi cancer natna bik atana hman a la ni rih thung.  He programme hian OPD Service leh In patient service hmangin damlote an enkawl thei a. Tin, thawktuten hetianga damlote hi in lamah kal chilhin a tul angin morphine leh enkawlna dangte an pe thin bawk a ni. Amaherawhchu, hetianga enkawl ngaite chuan Mizoram State Cancer Institute-ah in register a ngai thung a ni.