WORLD MALARIA DAY, 25th April, 2026
Theme : “Driven to End Malaria: Now We Can, Now We Must”
April ni 25 hi ‘World Malaria Day’ Khawvel pum huap Malaria Dona Ni’ a ni a. World Health Organisation (WHO) hnuaia World Health Assembly chuan kum 2007 khan Malaria (Sikserh) chungchanga inzirtirna leh hriat tur tul te inhrilhhriat thinna hun atan World Malaria Day hman a rel a. Tichuan, kum 2008 atang khan kum tin thupui neiin World Malaria Day hi April ni 25- a hman thin a lo ni ta a ni.
Mizoramah Malaria natna a la hluar hle a, tun dinhmunah India ramah mi sang khat (1000) zel atanga malaria vei hmuhchhuah zat (Annual Parasite Incidence-API) atanga chhutin Malaria tamna ber state nihna kan hauh mek zel a, hei hian Malaria dona kawnga tan lak kan ngaih nasat zia a lan tir. Mizoram-ah kum 2024 khan Malaria vei mi 16899 (Sing khat sang ruk zariat sawmkua leh pakua ) awmin, mi 7 in an nunna hlu tak an chan a. Kum 2025 ah Malaria natna vei mi 9328 (Sang kua zathum sawmhih leh pariat) an awm a, nunna chan mi 6 an awm bawk a ni. Kumin 2026 Jan-March thla chhungin Malaria hmuhchhuah tawh zat hi 666 niin nunna chan an awm lo.
Kum 2024 ah India rama Malaria vei hmuhchhuah zat chu mi 2,55,500 (Nuaih hnih sing nga sang nga leh zanga) niin mi 86 an boral a. Kum 2025 Malaria vei hmuhchhuah zat 2,33,555 (Nuaih hnih singthum sangthum za nga sawmnga leh panga) niin, nunna chan mi 55 an awm bawk a ni. India ramah hian India hmarchhak (North East) States te bakah Andhra Pradesh, Chhattisgarh, Gujarat, Karnataka, Madhya Pradesh, Maharastra, Odisha, Tamil Nadu, Uttar Pradesh leh West Bengal te hi Malaria tamna hmun a ni.
He ni denchhen hian Mizorama District zawng zawngah Malaria dona atana hmalakna hrang hrang kalpui niin; khawtlang mipui leh Pawl hrang hrang te nen Malaria chungchang inzirtirna hun te neih anih bakah Source Reduction Drive (Thosi pian theihna tui tling tihbo hnatlang) te, Lo/Huan neitu te Malaria laka an lo him theihnan a hmalakna chi hrang hrang te bakah school zirlai te nen hunh man ho a nibawk a ni. Heng bakah hian Malaria tamna District a Sumo leh HMV ah te Malaria Poster tar/bel a ni bawk.
