Ka chhung hriselna leh enkawl kawnga National Health Mission hnuaia Programme, National Oral Health Programme chuan vawiin March ni 21, 2022, chawhma dar 10:30 kha Taxation Auditorium, MINECO-ah World Oral Health Day an hmang a, he hun hi Dr.Eric Zomawia, Mission Director, National Health Mission chuan chuan Khuallian niin a hmanpui.

He World Oral Health Day pual inkhawm hi Dr.C.Lalrintluangi, State Programme Officer (NOHP) in kaihruaiin kalkhawmte lawmna thu a sawi a. Hemi hnu hian Dr. C.Zirsangliana Pedodontist, Lungdai PHC chuan kumin Oral Health Day thupui, Be Proud of Your Mouth tih hmanga powerpoint presentation pein ka chhung enkawl uluk a pawimawhzia leh a enkawl kawnga tih tur pawimawhte a tarlang a. Hemi hnu hian Khuallian Dr.Eric Zomawia, Mission Director chuan thusawina hun a hmang.

Dr.Eric Zomawia chuan "Ka chhung hriselna hian kan taksa-ah awmze thui tak a neih avangin hemi kawngah hian Mizo ten nasa lehzual zawka tan kan lak a ngai a, heng ka leh hrawk cancer kan tihte pawh hi a tam zawk chu zuk leh hmuamin a hrin chhuah te a nih avangin zuk leh hmuam laka fihlim turin tan i la thar ang u,"  tiin thawktute pawh nasa lehzuala mipui tana ke an pen theih nan duhsakna a hlan nghal bawk. Hun kar lakah ANM School naupangte leh zaithiam sawm bik ten zai leh Item hmuhnawm tak an entir bawk.

National Oral Health Programme hi kum 1995 atang khan NHM hnuaiah Mizoramah kalpui tan a ni a. NHM hnuaiah tunah hian  Darlawn PHC (Aizawl East Dist), Lungdai PHC (Kolasib Dist.), Chawngte CHC(Lawngtlai)-ah te NOHP Centre hi kalpui mek niin heng hmun te hian Staff pathum, Dental Surgeon, Dental Hygenist, Dental Assistant ten an thut chilh a ni. NOHP hi chak zawka a kal theih nan tunah hian thuam that chhoh mek a ni a. CHC leh District Headquarters tinah dah thuai tum a ni bawk.

Vawiina World Oral Health Day Programme chawhma inkhawm hi Dr. H.Lianthangpuia, Jt.Director cum State Nodal Officer, NTCP chuan lawmthu sawiin hun hnung a khar a. Chawhnu session-ah hian Dr.Zothantluangi leh Dr.Salome ten Dental Hygenist leh Dental Assistant te hnenah zirtirna hun an pe a ni.