Vawiin 24th March 2022 hi World TB Day a ni a. Hemi ni denchhen hian Mizoram hmun hrang hranga Health Unit ten hun an hmang. Aizawl-ah chuan District TB Centre, Falkawn (ZMC Complex)-ah he hun hi hman niin Pu Malsawmtluanga Hauhnar, Sr. Treatment Supervisor -in Programme a kaihruai a,  Dr Vanlalfela, State TB Officer chu Khuallian a ni.

World TB day pual hun buatsaih-ah hian kum 2021 chhunga District Performance Report Dr. Febiola Kharkongor  District TB Officer hnen atangin ngaihthlak a ni a, hemi hnu hian Khuallian Dr. Vanlalfela, State TB Officer chuan thusawiin National TB Elimination Programme (NTEP) in Prime Minister of India duh anga India ramah kum 2025 ah chuan TB tih rem tura hmalakna a kalpui angin Mizoramah pawh State TB Cell leh District TB Centre bakah hmun hrang hranga Health Dept. staff te nen tangrualin TB tirem tur hian theih tawp chhuaha hmalak zel a nih thu a sawi a. Tun hnaiah Active Case Finding pawh Mizoram hmun hrang hrangah kalpui mek niin, ACF ti chak tur hian Piramal Agency te nen thawk hovin Mizoram hmun hrang hrangah thla 4 chhung  lai TB vei hmuhchhuah kawnga tan an lo lak tawh thu a sawi a.  Hei hian nasa takin TB natna umbo kawngah rah tha a chhuah ngei a beisei thu a sawi bawk. Dr. Fela chuan Covid-19 hrileng avanga harsatna hrang hrang karah kum dang pha chiah lo mah ila, TB vei hmuhchhuah leh enkawl kawngah theihtawp an chhuah thu a tarlang bawk a ni.  

Dr. Febiola Kharkongor  District TB Officer report-in a tarlan danin

Kum 2021 chhunga Aizawl District-a TB vei hmuhchhuah dan hetiang hi a ni.

TB vei hmuh chhuah zat             1013

Chuap TB                                   508

Taksa peng dang TB                   505

Naupang kum 15 hnuai lam         58

TB/HIV                                      200 

MDRTB                                        99 

TB vanga nunna chan                    27 

2022 January - March chhunga  TB vei hmuhchhuah dan hetiang hi a ni.

TB vei hmuhchhuah zat               182 

MDRTB hmuh chhuah zat           18 

TB vanga nunna chan zat                4

Revised National TB Programme hi Mizoramah kum 2003 atang khan kal chhohpui tan a ni a. TB vei enkawl leh leh a veite dap chhuah kawngah nasa taka hma lak mek a ni. Tunah hian State TB Laboratory chu Bio Safety Level-III ni tura nasa taka thuam changtlun leh tih phuisui mek a ni a. Civil Works pawh zawh fel titih tawh niin Technical lamah hmabak tlem a la awm. Tunah hian Culture & DST Lab leh Line Probe Assay te hi peih fel tep a ni tawh a, hun rei loteah hawn leh hman thuai theih tura beisei a ni. Heng hmanrua te hi peih fel a nih hunah chuan TB vei dam lote sample, Guwahati lama thawn ngai leh hun rei tak tak nghah ngai thin chu ngai tawh lovin awlsam taka hriat zung zung theih a ni tawh dawn a, Hei hian TB avanga nunna chan kawngah pawh nasa takin kori a tu hle tawh tura ngaih a ni.

Dr. Lalrinmawii Khiangte, SMO-DRTB chuan World TB Day hmang tura lokal zawng zawngte chungah lawmthu a sawi a. Kan thiamna leh theihna te TB umbo kawngah chak taka hma la zel turin kalkhawm te a ngen nghal bawk a ni.