Nimin 31.1.2017 khan Mizoram pumah zenghri danna damdawi pek beihpui thlak ṭan a ni a, Health minister _'n Aizawl Civil Hospital (ACH)-a Surgery OPD kawtah a hawng.
Kumin chhungin Mizoramah naupang 1,40,288-te zenghri danna pek tum a ni.
Intensified Pulse Polio Immunization (IPPI) hawnna inkhawm hi Hospital & Medical Education director Dr K Lalbiakzuala'n a kaihruai a; Lal Thanzara chuan, IPPI kaltlanga sorkar laipuiin damdawi man to tak tak mipui tan a thlawna a pe chu lawmawm a tih thu sawiin, "Zenghri ûm bo tawh a rawn lan leh tawh lohna turin ṭan kan lak nasat a ngai a ni," a ti.
Health Minister chuan, zenghri ûm bo tura sorkarin nasa taka hma a lakna ringawt a tâwk lo tih sawiin, "Mipuiin sorkar an ṭawiawm ṭhat a ngai. Kan ṭan tlan a ngai a, zenghri danna hi la tawh tih awm loa la leh vek turin ka sawm a, nu leh pate'n an ngaihsak loh chuan a hlawhtling tâwk thei dawn lo. Naupang kum nga hnuai lamte'n an lak vek theih nan nu leh pate'n i ngaihven ang u," a ti a; zenghri chuan piansualna a thlen theih avangin do tlân a ngaih thu a sawi.
_ chuan, nausen thihna (IMR) leh nu nau chunga thihna (MMR) tihniam tur pawhin sorkarin theihtawpa ṭan a lak rualin, nute'n tih tur an nei ve tih a sawi a, "Ei leh ina an fimkhur a, zûk leh hmuama fihlîm a ngai. Nau piang hrisel tur chuan nu leh pate'n tih tur tam tak an nei ve a ni," a ti.
Dr K Lalbiakzuala chuan, zenghri danna pek beihpui, pulse polio immunization chu kum 1995-ah India ramah ṭan a ni tih a sawi a; India ram chu March 27, 2014-ah zenghri awm tawh lohna ram, polio free country-ah World Health Organization-in puang tawh mah se, a ṭhenawm ram Pakistan leh Afghanistan-ahte zenghri a la awm avangin zenghri danna inpek zel a la ṭul thu a sawi.
Nimina hawn tak IPPI hi kumina a thawh khatna a ni a, a thawh hnihna chu April 4-ah ṭan a ni ang.
Kuminah hian naupang kum nga hnuai lam 1,40,288 pek tum niin, Health department district pakuaah IPPI booth 1,403 a awm a, thawktu mi 2,806-in an buaipui dawn a ni. Kuminah vek hian India ram pumah naupang 17,45,03,635 pek tum a ni a, IPPI booth 7,98,306 a awm.
Kum 2016-ah pawh January thlaah zenghri venna pek beihpui thlak ṭan a ni a, naupang kum nga hnuai lam 1,26,823 pek tum a nih laiin, 1,25,795 (98.5%) pek a ni.
IPPI pek beihpui thlak hi Health department district tinah hawn a ni a, IPPI booth tinah pek ṭan a ni. Lungleiah chuan Salem Veng Health Sub-Centre-ah hawnna inkhawm buatsaih niin, chief medical officer Dr VLMS Dawngliana'n a hawng. Lunglei district-a kum nga hnuai lam 15,113 pek tum niin, IPPI booth 219 a awm.
Serchhipah chuan DC Dr Lalrozama'n New Serchhip bazarah a hawng a; district chhungah naupang 6,271 vel awm tura chhût a ni a, a pekna booth 71 siam a ni.
Lawngtlaiah chuan Areopagy-ah bul ṭanna inkhawm neih a ni a, CMO Dr Thani Pachuau-in vaccine pein a hawng. Lawngtlai district-ah hian IPPI booth 181-ah naupang 17,364 hnenah hri danna pek tum a ni.
