Nimin 7.8.2019 khan Zoram Medical College (ZMC) din champha lawmna, Founding Day vawi khatna chu vawiin khan Falkawn-ah khuallian Chief Minister Pu Zoramthanga hovin lawm a ni. Chief Minister chuan cheng vbc 1.6 senga sak Para-clinical building a hawng nghal a ni. ZMC Founding Day lawmnaah hian Health Minister Dr. R. Lalthangliana chu khualzahawm niin, Health & Family Welfare Board Vice-Cairman Dr. Z.R. Thiamsanga leh Aizawl South-III MLA Dr. F. Lalnunmawia te pawhin he hun hi an telpui a ni.

Chief Minister chuan medical college puitling siam tura a bulthut atanga hmalakna hrang hrang lo awm tawhte sawiin, vawiinah a din cham vawi khatna lawm a ni ta chu ropui a tih thu a sawi a. Kum khat chhung chauhin zirlai leh thawktute atangin hmasawnna hrang hrang hmuh tur a awm chu lawmawm a ti a. Chief Minister chuan Medical College din chu thil awl ai lo tak ni mahse mipuiin an mamawh avangin vawiin hi thleng ta kan ni tiin, sum mamawh pawh tam mahse sawrkar chuan ngaipawimawh in a theih chinah a pek zel thin thu a sawi a. Tunah pawh a tihchangtlun hna thawh tur tam tak awmin, medical college tha leh changtlung zawk a nih chhoh zel theih nan sawrkarin theihtawp a chhuah zel tur thu a sawi.

Health & Family Welfare Minister chuan ZMC zirlaite chu an zirnaah theihtawp chhuah turin leh, an thiltihah a tha ber an nih theih loh pawhin a tha zawk tal nih tum turin a chah a. Zirlaite chu MBBS ah duhtawk mai lovin zirna sang zawk beih chhunzawm theuh tum turin a chah a, an zir chhunzawm zelna turah leh hna an thawh hunah pawh ram pawna zirna in sang tha tak taka lut a thawk thei tur khawp a tumruhna leh taimakna nei turin a fuih. Health Minister chuan khawvel inelna sang tak a awm chhoh laiin thalai zingah beidawn avang leh thildang avangin ruihhlo lama kal ta te an awm a, kan khawtlang nun in a tuar phah hle a ni tiin vawiin thalaite, mithiamte chu khawtlang nun siamtha tura mi pawimawh ber an nih thu a sawi.

MLA Dr. Z.R. Thiamsanga chuan Zoram Medical College in hmasawn zel tur chuan zirlai leh zirtirtute chu academics an ngaipawimawh tul a a hriat thu a sawi a. Ram pum hriselna in hma a sawn dawn chuan hmun kilkhawr zawkte ngaihpawimawh a tul thu sawiin, zirlaite hnenah chuan an zirchhuah hnuah heng hmun kilkhawr zawkah te hian an thiamna chhawr tangkaia an rawng bawl sak chu hrehlo turin a chah a ni.

MLA Dr. F. Lalnunmawia chuan ZMC chuan medical college leh research hlun tak a la nih chhoh ngei a beisei thu sawiin, chumi atan chuan zirlai leh faculty leh sawrkar an pawimawh thu a sawi a. Zirlai leh researcher te chu hlawhtlinna um a an theihtawp chhuah zel tura chah in, teirei peihna leh taimakna neih a tul thu a sawi.

Vawiin inkhawm hi Health & Family Welfare Department Secretary Pu H. Lalengmawia’n kaihruaiin, ZMC Director Prof. L. Fimate hnen atangin Annual Report ngaihthlak a ni a. Sub Dean Dr. Haren Baruah leh Academic Officer Dr. Benjamin Lalrinpuia ten zirlai tithate chawimawina hun an kaihhruai a: ZMC a MBBS zirlai first batch exam a topper Lalrempuii Hmar leh subject zawng zawnga honour hmutu Vanlalchhuanpuia te hnenah lawmman pek a ni. Hemi bakah hian faculty zingah medical paper thahnem tak a publish avangin Dr. C. Vanlalhlua, Associate Professor, Dept. of General Surgery hnenah chawimawina hlan a ni bawk.

Foundation lawmna hunah hian khuallian hian PANACEA, ZMC annual magazine chu tlangzarh nghal in khualzahawm chuan Newsletter tlangzarh bawk. ZMC Registrar Dr. Jane R. Ralte chuan lawmthu sawiin hun a khar a ni.

Vawiina Chief Minister in a hawn tak Para-clinical building hi 2nd year a zir tur, department hrang hrang - Community Medicine, Pharmacology, Pathology, Microbiology te awmna tur a ni.

Zoram Medical College hi state leh sawrkar laipui tangkawpa din a ni a. CSS "Establishment of medical college attached with existing district/referral hospitals" hnuaia din niin, a project cost hi Rs. 189 crores a ni a, 90:10 funding a ni. Hemi scheme hnuaiah hian first phase ah India ram hmun hrang hranga hospital dang 58 rualin State Referral Hospital, Falkawn chu thlan tel ve a ni. Medical College din phalsak tura dilna, application hi Medical Council of India (MCI) ah tum Ii (4) thehluh a ni a. College hmunhma leh thawktute MCI danin a phut angte an awm em tih endik hna hi vawi 3 MCI lamin an rawn neih hnuah, 2018-19 academic session tan student 100 admit phalna chu 25th May, 2018 khan pek a ni. August hi 7, 2018 khan a hawnna program neih a ni a. He hawnna champha-ah hian kumtin Founding Day hman tura ruahman a ni. Hawn a nih hnuin a tuk August ni 8 ah orientation class tan nghal a ni a. Medical College din phalna (LOP - Letter of Permission) hi final year thleng chu kum tin a thara dil/renew a ngai a. Kumin May ni 3 khan college hi Medical Council of India chuan enfiah in May ni 25 khan First Renewal Permission chu a pe a. He phalna bawhzui hian MBBS second batch zirlai 100 la tura ruahmanna siam nghal niin, admission buaipui mek a ni a. Tun dinhmunah zirlai 70 chuang admit an ni tawh a ni.  

Semester exam hmasa ber chu nikum December ni 11-19 chhung khan buatsaih niin, kumin May ni 20-30 chhung khan pre-professional university exam neih leh a ni a, June ni 25 atanga July ni 12 chhung khan university exam buatsaih in hetah hian zirlai 99 exam atangin 77 chu an pass a. Zirlai 13 in Biochemistry ah honour an hmu a, zirlai 7 in Anatomy ah honour hmu in Physiology ah honour a pass pakhat a awm bawk a ni.

ZMC a thawktute hi Direct Recruitment a lak leh Mizoram sawrkar department atanga Deputation leh Transfer a thawk an awm a. Tun dinhmunah Faculty member 72 leh Resident 43 awmin, anni bakah hian staff hrang hrang 422 an awm a ni.

College leh teaching hospital tichangtlung turin hna thawh chhunzawm zel a ni bawk a. Academic Block thar tana building sak hna tunah hian thawh mek niin, hospital building leh staff quarter tihchangtlun hna thawh mek a ni a, mi 72 lenna tur mipa leh hmeichhe tan hostel sak mek a ni bawk