DENGUE NATNA CHUNGCHANGAH HEALTH DEPARTMENT HOTUTE THUKHAWM
DENGUE HRILENG RINHLELH CHUNGCHANGA PRESS RELEASE
Vawiin chawhma Dar 11:00am khan H&FW Department Principal Director hovin tunlaia Aizawl veng thenkhata Dengue natna leng nia hriat chungchang sawi hovin Health Department hotute an thukhawm.
Tunlai hian Aizawl veng thenkhatah Dengue (Dengee) natna a leng tih thawm hriat a ni a. Hemi chungchangah hian Health Deptt. chuan thuchhuah siamin mipuite chu chi-ai lo tur leh department-in a tir atangin hma a la reng a ni tiin an thu chhuah chuan a tarlang a ni.
Dengue natna hi khawsik, luna, mitmu na, taksa ruhrel leh tihrawl na, taksa bawl leh vual thak te in a langchhuak tlangpui a, heng bakah hian a na zual deuh zingah pumna, luak leh taksa atanga thi chhuak te a awm thei a, heng na zual te hi an awm a nih chuan a rang thei ang ber a damdawiin pan tur a ni. Damlo na zual lem lovah chuan nachawkna Paracetamol bak ei loh a him ber a. Tin, chaw leh thil tui ril tam thei ang ber ei tur a ni. Mahni a damdawi inchawh lovin doctor te rawn zel tur a ni.
Tunhnai hrileng bika thisen endik tawh hi mi 46 an ni a, heng zinga mi 2 te chauh hian Dengue hi an vei tih ELISA Reader hmanga finfiah a ni. ELISA reader hi India Sawrkar laipuiin Dengue hmuhchhuahna atana a pawm a ni a. Hetiang anih avang hian damlo zawng zawngte hi Dengue natna a ni vek kher lova, Dengue anga lang chhuak ve thei viral fever (tlang hrileng) leh natna dang tam tak a awm tho avangin Dengue vek anga ngaih erawh a tha ber lo a ni. Tin, dengue natna hi Department hian kum 2012 atang khan ELISA reader hmangin Aizawl Civil Hospital-ah a lo test tawh a, natna vei hmuh chhuah pawh mi 76 lai an lo awm tawh a, natna thar teh vak a ni hran lo a ni.
Dengue natna thehdarhtu thosi (Aedes thosi) te hi kan ramah an awm ve mai bakah Aizawl hmun thenkhat bikah an awm ngei tih finfiah a ni tawh a, mipuite chu thosi pian theihna tuitling tihbo chungchangah te, faina leh thianghlimna chungchangah te hmasawn kan ngai nasa hle tih hmuh a ni bawk. Dengue thehdarhtu thosi (Aedes thosi) te hi thosi te tak te (5 mm), a dum leh var a tial rik rek an ni a, khaw en laia mi seh chi niin, a bikin zingkarah leh tlai lamah mi an seh duh bik a ni. Thosi pakhat hian a puar khawp hmu turin mi sawm tal a seh a ngai tlangpui a, heng thosi te hi inchhunga chawl chi an ni ve vak lova, thlawk kual reng chunga mi seh chi an ni a, kan in chheh vela chawl hahdam thin an ni. Dengue thosi pian duh bikna te chu in leh a chhehvela tui tling entirnan; motor ke tyre chhia, pangpar pot, bucket chhia, plastic bur ruak, tuizem barrel te leh tuitling tih chet loh-ah te a ni.
Dengue thosi laka inveng tur hian thil harsa tih a ngai lova, kan in leh a vela tui tlin theihna tih bo te, thosi seh lak atanga invenna heng thosi hnawhbona/thahna hlo (All-out, Goodnight, Coils, Mortein) chhit te, taksa a chulhchi odomos te, kawrban tlawn leh kekawr tlawn phui tha tak hakte, chhun mutna a thosilen zar hram hram te a ni. Heng hian khawtlang leh mimalin mawhphurhna kan neih sanzia a ti lang chiang hle.
Hrileng chungchang hi Health Deptt a thawktute chuan chhun zan zawmin mumal takin an zir reng a. Entomological, environmental leh epidemiological surveillance te uluk taka kalpui reng a ni a, la tih chhunzawm zel tur a ni bawk. Tin, hmun pawimawh bik thosi tamna hmunah te thosi piantheihna tihrem hnatlangte, mipui inzirtirna te neih nghal zel a ni a, damlo awmte dinhmun en nghal niin an thisen te endik tura thawn nghal zel a ni bawk. Tin, State dang atanga a vei rawn haw te lo finfiah a hmala turin Deptt chuan Doctor leh thawktu dangte nitin Lengpui Airport ah duty tur a dah reng a ni.
Dengue vei ni a inringhlel te chu Civil Hospital, Aizawl leh Civil Hospital, Lunglei a Sentinel Site-ah te a thlawnin ELISA reader hmang ngeia thisen exam tir turin a chah a. Tin, private sector lama damlo rinhlelh nei te pawhin ELISA hmang ngei a thisen test tir thin nise a ti a ni.
Health Dept chuan mipuite chu department thuchhuak ni lo, mi tawngka leh social media a thuchhuah nazawng te awih mai lo turin a chah a, chanchin hrechiang duh tan deptt a thawktute chu engtiklai pawhin zawh theih reng an ni.e
