Health Department chu Hridanna beihpui thlak turin an inpuahchah mek a. Hemi chungchangah hian a hnuaia tarlan ang hian thuchhuah an siam.
Measles leh Rubella natna te hi Mizoram chhûngah awm reng a, natna lanchhuah dân nasa ni lo mahse a hnu-a harsatna(Complication) hrang hrang thlen thei a ni. He natna pahnih(2) te hi Vaccine hmanga invên theih anih avângin India sorkar chuan tun kum December 2023-ah hian Measles(Sentût) leh Rubella natna chu ûmbo tûrin ruahmanna a siam a.
He natna pahnihte ûmbo tûr leh natna hrang hrang hridânna dawng thei nu naupai leh naupang zawng zawngin an dawn ngei theih nân India sorkâr chuan Hridanna beihpui thlâkna – Intensified Mission Indradhanush 5.0 chu kumin August, September leh October thlaa kalpui tûrin ruahmanna a siam a. Health Department, Mizoram sorkâr pawhin he beihpuithlâk hi Mizoram pumah kalpui tûrin a in buatsaih mêk a ni.
Hridanna hi National Health Mission hnuai-ah Universal Immunization Programme-ah natna chi 11 vêng tûrin Nu naupai leh naupangah te Vaccine pêk a ni a. Hridanna hmang hian khawvêlah Smallpox (Zawnghri) ûmbo a lo ni tawh a. India ram chu Zenghri leh Nu leh nausen sakawrekhrik (Tetanus) awm lohna-ah puan a lo ni tawh bawk a. Nausen thihna (Infant mortality) leh Nu naupai lai thihna (Maternal mortality) pawh hridanna pêk avângin nasa taka tih tlêm a lo ni tawh bawk.
Inbuaisaihna kalpui mêkah vawiin ni 2 August, 2023 hian Universal Immunization Programme, NHM leh USAID hnuaia MOMENTUM Routine Immunization Transformation & Equity Project, John Snow India-te huaihawtin Media lam a thawktute hnênah zirtirna pêk a ni.
Dr. Gopal Krishna Soni, Project Director, USAID supported MOMENTUM Routine Immunization Transformation & Equity Project chuan an project chungchâng heti hian a sawi, “He project hian Covid-19 Vaccination-ah khân sorkâr thawhpuiin India ram State 18-ah hlawhtlinna a lo hmu tawh a. Mizoram-ah pawh sorkâr hmalâkna thlâwpin, Kohhran leh khawtlang hruaitute thawpuiin mipui hnênah vaccine rintlâkzia hrilhin, Covid-19 vaccine hlawhtling takin kal pui a ni tawh bawk a. He hlawhtlinna chhunzawm hian Nu naupai leh Naupang hridanna chi hrang hrang te hi pêk a nih chuan hlawhtlinna nasa zâwk neih theih a ni. Kan zavai a kan tan ho chuan, he IMI 5.0 hmang hian Vaccine-in a a vên theih natna hrang hrang te lakah hian ka fihlim thei. Hrisêlna lama thawktu te, media lama thawktu te leh mipui kan tanrual chuan kan ram hi kan lo hrisêl zâwkin, natna tam tak lakah kan fihlim dâwn a ni”.
Health Department chuan mipui kan hrisêl zâwk nân, nu naupai leh naupang zawng zawngte, an kum mila lâk tûr hridanna la theuh tûrin a ngen a ni.
