SAKAWRDAI LEH A CHHEHVELA JAPANESE ENCEPHALITIS ZIR CHIANGTU EXPERT TEAM TEN AIZAWL AN LO THLENG LEH TA.
TUN DINHMUNAH JE NATNA LAKAH KAN LA FIHLIM
Manipur Churachanpur leh a chhehvelah Japanese Encephalitis a len avanga lo inralrinna leh JE chungchanga ramri dep khaw hrang hrang dinhmun zirchiang tura Expert Team tirhchhuahte chuan August ni 9 atanga ni 11 chhung khan Sakawrdai leh a chhehvel fanga hun an han hman zawh hnu ah August ni 12, 2016 khan Aizawl an lo let leh ta.
Heng Expert Team te hi an vaiin 13 niin Dr. Pachuau Lalmalsawma, State Nodal Officer, IDSP in a ho va. August ni 9 khan Sakawrdai an thleng chho va. Hemi ni hian Sakawrdai khaw chhunga thosi te manin uluk taka zir chianna neih a ni.
August ni 10 khan Sakawrdai Community Hall-ah Public Meeting leh free clinic buatsaih a ni a. August ni 11 khan Tinghmun leh Vaitin-ah Public meeting leh free clinic buatsaih a ni bawk. Heng public meeting-ah te hian Dr. Pachuau Lalmalsawma, expert team Leader leh Dr. Zorammuana, M&E Consultant, SVBDCP ten JE natna chungchang leh a awmzia sawifiahin Powerpoint Presentation an pe a. Lalfakzuala Pautu, State Entomologist, IDSP hnen atangin JE natna thlen theitu Thosi awm zia, an chenna leh khawsak phung chipchiar takin ngaihthlak a ni bawk. Tin, Malaria Technical Supervisor leh Malaria Inspector te pawhin zirtirna an pe nghal bawk a. Thosi hnawhbona khawl chikhat, fogging machine hmangin khawchhunga thosi chen duhna laitur te kah khuk a ni bawk.
Heng khaw pathum Sakawrdai, Tinghmun leh Vaitin-ah te hian Mobile Medical Unit (MMU) ten Free Clinic an nei a. Damlo te hi MMU atangin Doctor pahnih, Pharmacist pakhat leh Lab Technician ten a tul angin an en a. Sakawrdai-ah mi 250, Tinhmunah mi 180, Vaitin-ah mi 90 an en a. Tinghmunah hian Malaria case pahnih, PF leh PV te hmuhchhuah an ni a. Damlo te hnenah hian a thlawnin damdawi pek an ni nghal bawk.
Dr. Zorammuana, M&E Consultant, SVBDCP chuan JE natna chu vawk leh thosi inkara kal kual thin a ni a. A pawng a taka lo hlauh chiam chi a nih loh thu sawiin JE virus pai thosi in vawk a sehin vawkah JE natna chu nasa takin a inthlahpung a, chu vawk chu thosi in seh lehin mihringah a kai chhawng thei a. Mihring atang erawh chuan thosi hian a put darh theih tawh loh avangin JE natna hi mihring atanga mihring veka thosi hmanga kai darh theih a ni tawh lo a, mihringah a tawp mai a ni a ti. Dr.Mamuana chuan Mizoramin JE enfiahna khawl kan neih theih nana theihtawp chhuah a nih thu sawiin test kit pawh a lo thlen tawh thu a sawi bawk.
Lalfakzuala pautu, IDSP Entomologist pawhin Sakawrdai leh a chhehvela thosi species hrang hrang a lak khawmte chu chiang leh zuala zirchian an nih tur thu a sawi a. Tun dinhmunah hian Sakawrdai leh a chhehvelah JE natna a la awm lo ni a a hriat thu a sawi a. Amaherawhchu Manipur ramri dep maia awm an nih avangin state dang atanga hriatchian loh vawk lo lut thin lakah khaw mipuite an tanrual a ngaih tur thu a sawi a. JE virus pai vawk lo lut a awm palh hlauh a nih chuan a thehdarhtu bik thosi Culex thosi te hi kan ramah an awm ve tho si avangin chung kaltlang chuan JE hi darh hluai thei dinhmunah a ding tho a ni a ni a ti, Pu Faka chuan khawtlang mipuite chu mahni chenna leh a vel vawng fai a, tui fim tling tihbo tur leh tha taka DDT kah that tirtur te, uluk taka thosilen zar thin turin a fuih bawk a ni.
Expert Team te chuan tunlaiin social media lama JE natna avanga nunna chan anga thuthang dik lo thehdarh an awm fo chu pawi an ti hle a. Hetiang tih chingte hian mi rilru an ti phawklek a, tul lovah mi an ti chi-ai a ni tiin hemi kawngah hian fimkhur turin mipuite an chah nghal bawk a ni.
